Mbunge Atoa Miwani 1276 Kwa Wananchi Kondoa

Tarehe iliyowekwa: February 14th, 2018

Mbunge wa jimbo la Kondoa Mjini Mh. Edwin Sannda ametoa miwani zaidi ya elfu moja kwa wananchi wa Wilaya ya Kondoa ili kukabiliana na tatizo la macho kwa wananchi wa wilaya hiyo na maeneo ya jirani.

Zoezi la kukabidhi miwani hiyo kwa Mkurugenzi wa Halmashauri ya Mji lilifanyika katika viwanja vya Hospitali ya Wilaya ya Kondoa na kuhudhuriwa na viongozi wa dini, vyama, wilaya ya wananchi.

Akiongea wakati wa sherehe hizo Mh. Sannda alisema kuwa lengo la kukabidhi miwani hiyo ni kukabiliana na matatizo ya macho yaliyogundulika wakati wa zoezi la kutoa huduma ya hospitali tembezi lililofanywa na madaktari bingwa kutoka mkoani Dodoma.

Aliongeza kuwa wagonjwa wengi walionekana kuwa na tatizo la mtoto wa jicho, presha ya macho na kutokuona mbali na kukosa huduma hiyo wakati huo hivyo wakaona ni vyema kutafuta wadau ili wananchi wapate huduma hiyo ambayo ni muhimu na kufanikisha kupatikana kwao na ndio waliotoa msaada huo unaokabidhiwa.

Aidha alilishukuru shirika la Head Inc lililopo nchini Marekani kwa  kuonyesha uzalendo mkubwa na kuwasaidia wananchi wa Kondoa na maeneo ya jirani ikiwemo Chemba na Kiteto kupata huduma hiyo muhimu tena bila gharama zozote.

Naye Kaimu Mganga Mkuu wa Wilaya Dkt. Eusebia Kessy alimshukuru mbunge kwa msaada huo na kumuahidi kuwa huduma hiyo itafanywa kwa uaminifu mkubwa na kuwafikia walengwa na kusema kuwa huduma hiyo itatolewa kwa siku tano na baada ya siku hizo kukamilika miwani itakayobakia itaendelea kutolewa kwa wananchi watakaojitokeza baadae hadi itakapoisha.

Ofisi ya Mbunge wa Kondoa Mjini imetoa miwani yenye zaidi ya shilingi milioni arobaini kwa wananchi wake na maeneo ya jirani ili kukabiliana na tatizo la macho kwa wananchi huduma ambayo itaambatana na upimaji wa macho kabla ya kukabidhiwa miwani na huduma hizo zitatolewa bure.