Mbunge Makoa azindua madarasa Shule ya Msingi Chemchem

Tarehe iliyowekwa: March 7th, 2025

Mbunge wa Kondoa mjini Mhe. Juma Ally Makoa amezindua madarasa 3 yenye thamani ya shilingi milioni 69 pamoja na matundu 6 ya vyoo yenye thamani ya shilingi milioni 12.6 katika Shule ya msingi ChemChem iliyopo katika Kata ya Kingale.

Lengo la ujenzi wa madarasa hayo  ni kupunguza msongamano wa wanafunzi darasani pamoja na kuboresha mazingira ya kufundishia na kujifunzia.

Aidha Mhe. Makoa amemshukuru Rais wa Jamhuri ya Muungano wa Tanzania Dkt.Samia Suluhu Hassan kwa kuridhia fedha kuletwa katika Halmashauri ya Mji Kondoa  ili miradi iweze kutekelezwa.

"Sasa hii ndio Serikali ya Dkt. Samia Suluhu Hassan madarasa  yaliyowekwa vigae madirisha ya vioo nani kama Samia"amesema Mhe. Makoa

Ameendelea kwa kuwasisitiza walimu kutunza madarasa hayo ili yadumu kwa kipindi kirefu na bado ana mpango wa kuifanya Shule ya ChemChem kuwa bora zaidi kama zilivyo Shule nyingine za mjini.

Hata hivyo amewaahidi wananchi wa ChemChem kuwa anashughulikia suala la umeme Ili wananchi wa eneo hilo waweze kupata huduma hiyo kwani tayari amekwishatafuta baadhi ya nguzo jambo litakalopelekea huduma hiyo ya umeme kufika katika eneo hilo.

Aidha amempongeza Mkurugenzi na wataalam kwa usimamizi mzuri na wa karibu wa miradi yoten a jopo lako kwa usimamizi mzuri wa miradi inayoletewa fedha na kukamilika kwa fedha iliyoletwa.

Nae mwenyekiti wa Halmashauri ya Mji Kondoa Mhe. Mohamed Kiberenge amempongeza Mhe. Mbunge kwa kazi nzuri anayoifanya hususani kuhakikisha miradi mbalimbali inaletwa katika Halmashauri ya Mji Kondoa ikiweno miradi ya Shule.

Kwa upande wake Kaimu Mkurugenzi Halmashauri ya Mji Kondoa Ndg. Sekela Mwasubila amemshukuru Mhe. Mbunge kwa kuendelea kuwasemea bungeni wananchi wa Kondoa Mjini na kupelekea fedha kuja Halmashauri na kutekeleza miradi ikiwemo ujenzi wa madarasa ya Chemchem.

Hafla hiyo imehudhuriwa na Wakuu wa Idara na Vitengo,  viongozi wa chama kata ya Kingale, Mwenyekiti wa Mtaa na wananchi wa mtaa wa Chemchem.