Mbunge Sannda Aishukuru Serikali kwa Fidia

Tarehe iliyowekwa: May 18th, 2019

Mbunge wa Kondoa Mjini Edwin Sannda ameishukuru serikali ya awamu ya tano kwa kutoa zaidi ya shilingi milioni 13 ikiwa ni fidia kwa wananchi waliovamiwa na wanyamapori kutoka pori la akiba la Swagaswaga.

Shukrani hizo alizitoa wakati wa mkutano wake, wananchi wa Mtaa wa Iyoli na viongozi wa kata ya Kingale uliofanyika katika mtaa wa Iyoli hivi karibuni.

"Fedha hizi ni kwa ajili ya wananchi waliovamiwa na wanyamapori kwa mwaka 2015, 2017 na 2018 na ambao bado hamjapata nawaomba muwe na subira." Alisema Mhe. Edwin Sannda

Kwa upande wake meneja wa pori la akiba la Swagaswaga  Bwana Choya Alex alifafanua kuwa fedha hizo ni kwa ajili ya wananchi walioharibiwa mazao yao, waliojeruhiwa na ndugu wa waliouwawa na wanyamapori kutoka pori la Swagaswaga.

Jumla ya wananchi 61 wamepatiwa fedha na serikali  ikiwa ni fidia kwa wananchi wa Iyoli ambapo zoezi hili lilisimamiwa na  Ofisi ya Mkuu wa Wilaya, mbunge wa Kondoa Mjini, Meneja wa pori la Swagaswaga na viongozi wa kata ya Kingale.