Menejimenti watembelea ujenzi wa Bolisa Sekondari

Tarehe iliyowekwa: September 5th, 2023

Timu ya Menejimenti Halmashauri ya Mji Kondoa wametembelea eneo linalojengwa Shule mpya ya Sekondari Bolisa ili kujionea jinsi mradi huo unavyotekelezwa.

Mradi huo unatekelezwa baada ya Serikali Kuu kupitia mradi wa SEQUIP kutoa zaidi ya shilingi milioni  540 kwa ajili ya  utekelezaji wa mradi huo ambapo lengo ni kuongeza wigo wa shule za sekondari na kupunguzia umbali wa kutembea wanafunzi wa kata hiyo na shule za kata jirani jirani.

Akiongea Mkuu wa Divisheni ya Elimu Sekondari Mwalimu Annette Nara amesema fedha hizo zimetolewa kwa ajili ya ujenzi wa jengo la utawala 1, madarasa 8, matundu 8 ya vyoo, jengo la TEHAMA na jengo la maktaba.

"Kama mnavyoona kazi inaendelea na hatuna iliyopo ni umwagaji wa jamvi ambapo wengi wamekamilisha wamebakia wachache wanakamilisha na kazi inayofuata ni upandishaji wa kuta na tunatarajia kukamilisha Septemba 20,2023,"amesema Mwalimu Nara

Ameongeza kwa kusema kuwa fedha hizo pia zitatumika kutengenezea fenicha za madarasani ambazo zitaanza kutengenezwa hivi karibuni ili majengo yanapokamilika ni kuziweka madarasani.

Akiongea Kaimu Mweka Hazina Halmashauri ya Mji Kondoa CPA (T) Rahabu Sanga ameipongeza Divisheni ya Elimu Sekondari kwa usimamizi mzuri na kuwashauri kufuata mwongozo wa utekelezaji wa mradi ili kuepusha kuzalisha madeni ya mafundi na wazabuni wa vifaa.

Aidha Menejimenti imemshukuru Mhe. Rais Samia Suluhu Hassan kwa kuleta fedha hizo kwani zitasaidia kwa kiwango kikubwa kuboresha elimu ya Sekondari wa Halmashauri ya Mji Kondoa kwa wanafunzi wa kata ya Bolisa na kata jirani.