MFUKO WA JIMBO WAWAKUNA WANANCHI WA KIJIJI CHA MLUA

Tarehe iliyowekwa: February 2nd, 2018

Usimamizi mzuri wa fedha za Mfuko wa Jimbo umewagusa wananchi wa kijiji cha Mlua na kupelekea kuchangia ukarabati wa darasa lingine katika Shule ya Msingi Mulua.

Hayo yameonekana wakati wa ziara ya wajumbe wa kamati ya Mfuko wa Jimbo iliyofanyika hivi karibuni katika shule hiyo kwa ajili ya ukaguzi wa madarasa yaliyopata fedha za mfuko wa jimbo kwa ajili ya umaliziaji wake.

Akiongea wakati wa ziara hiyo Mwalimu Mkuu wa Shule hiyo Mwalimu Eliona Siara amesema kuwa wazazi walifurahia sana kupata fedha hizo na walipoona kazi iliyofanywa kuwa ni nzuri waliamua wenyewe kujichangisha na kukarabati darasa lingine lililokuwa katika hali mbaya.

Aidha aliongeza kuwa uwazi wa matumizi ya fedha hizo yote yamebandikwa shuleni hapo na kila mtu anaruhusiwa kuona jambo ambalo limewakuna wadau kuchangia ukarabati wa shule hiyo na wameahidi kuendelea kushirikiana na kamati ya shule kuhakikisha shule yao inakuwa katika mazingira mazuri ya kujifunzia.

Naye Mjumbe wa kamati hiyo Mh. Zainabu Haroub alimpongeza Mwalimu huyo kwa juhudi anazozifanya shuleni hapo na kumtaka aendelee kusimamia ukarabati wa darasa lililopo ili kuondokana na tatizo la madarasa shuleni hapo wakati fedha zingine za umaliziaji zikitafutwa.

Ziara ya ukaguzi wa Miradi iliyopata fedha za Mfuko wa jimbo ulifanyika hivi karibuni ambapo wajumbe walitembelea katika shule za Mlua, Ubembeni na Chang’ombe na kushindwa kufika katika kijiji cha Serya kutokana na changamoto ya kukatika kwa barabara kutokana na mvua iliyokuwa ikiendelea kunyesha.