Mhe. Ditopile atoa chakula kwa watahiniwa wa darasa la saba

Tarehe iliyowekwa: September 12th, 2023

Mbunge wa viti maalum mkoa wa Dodoma Mhe. Mariam Ditopile ametoa chakula cha mchana kwa ajili ya kuwapikia wanafunzi wanaofanya mtihani wa kumaliza elimu ya msingi unaotarajia kuanza kesho.

Chakula hicho kimekabidhiwa na Mwenyekiti wa Halmashauri ya Mji Kondoa Mhe. Mohamed Kiberenge kwa niaba yake katika hafla fupi iliyofanyika katika viwanja vya ofisi ya Halmashauri ya Mji Kondoa.

"Kwanza niwashukuru walimu kwa kuitikia wito kuja kupokea chakula hiki ambacho ni mchele na maharage ambacho kitatumika wakati wa kipindi hiki cha mitihani na kimetolewa na mbunge wa viti maalum Mhe. Mariam Ditopile,"amesema Mhe. Kiberenge

Aidha amesema wataendelea kupongeza wadau mbalimbali wanaojitokeza katika kuchangia maendeleo ya wanakondoa na kuomba wadau wengine kujitokeza kuchangia katika mtihani wa kidato cha pili na nne.

"Sisi kama Halmashauri peke yetu hatuwezi lakini kwa kusaidiana na wadau mbalimbali tunaweza kunyenyua ufaulu wa wanafunzi qa Halmashauri ya Mji Kondoa,"amesisitiza Mhe. Kiberenge

Jumla ya shule 28 za msingi za serikali zimepokea chakula kilichotolewa katika hafla iliyofanyika katika viwanja vya Halmashauri ya Mji Kondoa na kuhudhuriwa na baadhi ya Waheshimiwa madiwani na walimu wawakilishi za shule za msingi.