Mhe. Kiberenge aishukuru Serikali kuwekeza katika elimu

Tarehe iliyowekwa: October 4th, 2024

Mwenyekiti wa Halmashauri ya Mji wa Kondoa Mhe. Mohamed Kiberenge amempongeza Rais wa Jamhuri ya Muungano wa Tanzania Mhe. Dkt Samia Suluhu Hassan kwa kuendelea kuwekeza nguvu kubwa katika miundombinu ya sekta ya elimu katika Halmashauri ya Mji Kondoa.

Ameyasema hayo wakati wa maadhimisho  ya Juma la Elimu yaliyofanyika katika viwanja vya Sabasaba hivi karibuni.

"Tumeona Sekondari zimejengwa kupitia serikali yetu, kupitia mradi wa SEQUIP  tumeona shule ya Sekondari Bolisa na Tura  zimejengwa" ameongea Mohamed Kiberenge ambaye alikuwa mgeni rasmi katika maadhimisho hayo.

Akikagua mabanda mbalimbali ya  maonesho katika viwanja vya Sabasaba mapema Mhe. Kiberenge amewataka wasimamizi wa masuala ya utalii kuhakikisha wanawakaribisha wanafunzi wengi kutembelea vivutio vya utalii vilivyopo Kondoa ili waweze kujifunza zaidi.

Hata hivyo Kaimu Afisa Elimu Sekondari Ndg. Saimon Fidelis amewasisitiza wanafunzi wote na jamii kwa ujumla kutumia maadhimisho hayo kutangaza shughuli mbalimbali zinazopatikana katika maeneo hayo ili kujiletea maendeleo.

Mhe. Kiberenge ameendelea kuishukuru Serikali ya sita kwa kuendelea kusimamia elimu ya MEMKWA kwa watoto waliokosa elimu katika shule za kawaida na Sasa wanapata elimu jumuishi.

"Nisisitize kwa wanafunzi ambao hawakufanikiwa kuendelea na elimu ya juu waende kwenye vyuo vya ufundi kwa sababu serikali yetu imewekeza nguvu kubwa kwenye mafunzo ya elimu ya vitendo kwa wale ambao hawakufanikiwa kwenda elimu ya juu" amesisitiza Mhe. Kiberenge.

Maadhimisho ya juma la elimu kwa watu wazima ambayo hufanyika Kila mwaka katika maeneo mbalimbali nchini kwa upande wa Kondoa Mji yamepambwa na burudani mbalimbali ikiwemo muziki, bendi, mashairi pamoja na maigizo.

Kilele Cha maadhimisho haya kitakuwa tarehe 11 mwezi 10 mwaka 2024 mkoani Tabora ambapo mgeni rasmi anatarajiwa kuwa Naibu Waziri Mkuu wa Tanzania Mh. Dkt Dotto Biteko.