Mhe. Rais, Ditopile watoa milioni 15 kwa Wanawake wa Vikoba Kondoa

Tarehe iliyowekwa: March 13th, 2023

Rais wa Jamhuri ya Muungano wa Tanzania Mhe. Dkt. Samia Suluhu Hassan ametoa shilingi milioni kumi kwa wanawake wa vikoba katika Halmashauri ya Mji Kondoa na kuungwa mkono na Mbunge wa Viti Maalum mkoa wa Dodoma Mhe. Mariam Ditopile kwa kuwachangia shilingi milioni tano.

Habari njema hizo zimetolewa na Mhe. Mariam Ditopile wakati akiongea katika kongamano la umoja wa vikoba katika Halmashauri ya Mji Kondoa akiwa mgeni rasmi lililoandaliwa na Shirika la msaada wa kisheria la JUST lililopo katika Halmashauri ya Mji Kondoa.

“Uongozi ni dhima kubwa na tumebeba maisha ya watu na tunafanya kila kitu kwa niaba yao hivyo viongozi tunapaswa kuzijua na kujali shida zenu japokuwa si rahisi kuzitatua zote ila tunapoweza tuwasaidie,”amesema Mhe. Ditopile

Ameongeza kwa kuwaambia wakinamama hao kuwa wafanye shughuli zao kwa amani kabisa kwa kuwa wapo kisheria na Katiba ya nchi inawatambua na serikali imeona umuhimu wa vikoba kwao ndio maana wamewatungia sheria ili kuwalinda hivyo amewapongeza JUST kwa kutoa elimu hiyo kwao.

“JUST mnafanya kazi kubwa sana hata kwa hili mnaunga mkono juhudi za Mhe. Rais anayewapambania wananchi wake usiku na mchana na hapa kuna madiwani wanawake hawa nao wanawapambania nyie kwenye vikao vya Halmashauri ili mpate fedha za asilimia kumi zitokanazo na makusanyo ya Halmashauri,”amesisitiza Mhe. Ditopile

Aidha amewataka kutokatishwa tamaa na wanasiasa wasioona umuhimu wa vikoba na kutoa kauli zisizofaa kwa kuwa wapo viongozi na wataalam wengi wamesomeshwa kwa kupitia vikoba na wananwake wengi kwasasa wamejiinua kiuchumi kwa kupitia vikoba na wasijidharau kwa kuwa vikoba ni utajiri.

“Naona pia mmempongeza Mhe. Rais kwa kufikisha miaka miwili madarakani kweli amefanya makubwa ikiwemo kujenga zahanati, vituo vya afya, ajira na kupandisha madaraja watumishi pamoja na kuwalipa kiinua mgongo waliotolewa kazini pamoja na hayo bado anaendelea kutafuta wadau wa maendeleo nje na ndani ya nchi tusiache kumuunga mkono na kutumia fursa zinazojitokeza kila wakati,”amesema Mhe. Ditopile

Akiongea awali Mwenyekiti wa Halmashauri ya Mji Kondoa Mhe. Mohamed Kiberenge amempongeza Mhe. Rais kwa kuleta fedha za utekelezaji wa miradi kwa wingi na kufungua fursa mbalimbali za nje na ndani ya nchi na kuwasihi wakinamama hao kutumia fursa za mikopo ya Halmashauri na kuipongeza divisheni ya Maendeleo ya Jamii kwa kusimamia vizuri zoezi la utoaji wa mikopo ya asilimia 10.

Akitoa neno la shukrani kwa niaba ya wanavikoba waliofika Bi Salama amemshukuru Mhe. Rais kwa kuwakumbuka wakinamama wa vikoba na kuwatungia sheria kwani awali walikuwa wanaona kama mchezo tu lakini kwasasa wanaishukuru Serikali kwa kuwakumbuka na wana imani watafanya makubwa zaidi.

“Tumeona mama akifanya makubwa ndani ya miaka miwili ambayo mengi yalisimama na tumeona fursa za wanawake na wasichana  kibao bila yeye yasingewezekana Mwenyezi Mungu azidi kumpa maisha marefu na tunamuahidi mwaka 2025 kura zaidi ya 2020 na fedha alizozipata tutazifikisha hadi kwa wenzetu wenye ulemavu,”amesema Bi. Salama

Kongamano la umoja wa vikoba Kondoa limefanyika kwa lengo la kutoa elimu ya masuala mbalimbali kwa wanavikundi wa vikoba ambapo mada za wosia,vikoba na usawa wa kijinsia zilitolewa ambapo vikundi vya vikoba vilihudhuria na mgeni rasmi alikuwa ni Mbunge wa Viti Maalum Mhe. Mariam Ditopile ambaye alibeba kauli mbiu ya miaka miwili ya Mhe. Rais madarakani iliyosema “miwili ya mama hakuna kilichosimama, Kazi iendelee.