Mhe. Waitara awaasa wanafunzi Shule ya Wasichana Kondoa

Tarehe iliyowekwa: August 17th, 2020

Naibu Waziri wa OR TAMISEMI Mhe. Mwita Waitara amewasihi wanafunzi wa Shule Sekondari ya Wasichana Kondoa kujifunga mikanda na kusoma kwa bidii ili wapate matokeo mazuri yatakayowawezesha kujiunga na vyuo vikuu watakavyo.

Ameyasema hayo alipokuwa anaongea na wanafunzi na walimu wa shule ya Sekondari ya Wasichana Kondoa baada ya kufanya ukaguzi wa majengo yaliyofanyiwa ukarabati mkubwa ikiwa ni moja ya shule zilizopata fedha za ukarabati wa shule kongwe kutoka serikali kuu.

“Punguzeni usingizi wekeni ratiba ya kusoma ili mfaulu na nimepata taarifa zenu kuwa mnafanya vizuri nawapongeza bodi ya Shule, walimu na nyie wanafunzi kwa kuwa mnajisimamia vizuri na naamini kutoka hapa tutapata viongozi wazuri sana hapo baadae,”alisema Mhe. Mwita.

Aliongeza kuwa wanafunzi wametumwa elimu na si kubeba mimba kwa kuwa mtoto wa kike akisoma vizuri ana nafasi kubwa ya kuibadilisha familia na maisha yake kwa ujumla na muda wa wao kujipanga ni sasa ambapo wazazi wanawekeza kwao.

“Najua mmefurahia ukarabati uliofanyika kwa kuwa umeboresha mazingira ya  kujifunzia na kufundishia pongezi nyingi kwa Mhe. Rais wetu kwa kuona umuhimu wa kukarabati shule hii hivyo tumwombee aendelee kuwepo ili maono yake ya awamu ya pili yatimie,”alisisitiza Mhe. Waitara

Aidha aliwashauri viongozi wa Wilaya kushirikiana na wadau wengine ili kuboresha na kuisogeza mbele elimu kwa kuwa kuna mambo ambayo yanafanywa na serikali na mengine yanapaswa kufanywa na wadau ambao wanapatikana ndani na nje ya wilaya.

Aidha aliwapongeza viongozi kwa kusimamia vizuri fedha zilizotolewa na serikali kwa ajili ya ukarabati kwa kuwa kwenye baadhi ya maeneo yaliyofanya vibaya viongozi wameishia kwenye vyombo vya sheria na kuwasisitiza kusimamia majukumu yao yote vizuri na kuwashukuru walimu kwa kufanya kazi kwa kujitolea.

Akiongea kwa niaba ya wanafunzi wenzake Rais wa Shule ya Wasichana Kondoa Getrude Gadau amesema shule yao ina changamoto ya upungufu wa maji, ukosefu wa gari la shule kwa ajili ya kufanya shughuli mbalimbali za shule na ubovu wa barabara ya kufika shuleni hapo.

Akijibu changamoto hizo Mkurugenzi wa Halmashauri ya Mji Kondoa Msoleni Dakawa amesema kuwa changamoto ya barabara inaendelea kufanyiwa kazi kwa kuwa ipo katika miradi ya kimikakati na itawekewa lami na kuchimba kisima kirefu ambacho kitasaidia wanafunzi na wananchi wa jirani.

Mhe. Mwita Waitara ametembelea shuleni hapo na kukagua majengo yaliyokarabatiwa baada ya kupewa shilingi bilioni 1.12 katika mpango wa ukarabati wa shule kongwe na aliongozana na Mkurugenzi wa Elimu Msingi OR TAMISEMI.