"Mikopo itumike ilivyopangwa kwenye maandiko ya miradi"- Mkurugenzi Dakawa

Tarehe iliyowekwa: August 20th, 2020

Mkurugenzi wa Halmashauri ya Mji Kondoa Msoleni Dakawa ameviasa vikundi vilivyopata mikopo iliyotokana na asilimia 10% ya mapato ya ndani kutumia kwa kufuata maandiko ya miradi waliyoandika wakati wa kuomba mikopo hiyo.

Kauli hiyo ameitoa wakati wa hafla fupi ya kukabidhi hundi yenye thamani ya shilingi milioni 39.5 iliyotolewa kwa vikundi vya wanawake, vijana na watu wenye ulemavu kwa robo ya tatu iliyofanyika katika jengo la kituo cha uwekezaji kilichopo Kondoa Mjini.

“Tunataka mkakue kibiashara na kufungua makampuni yatakayowapa fursa ya kufanya biashara popote ndani na nje ya nchi na kupata mikopo mikubwa zaidi ambayo itawaongezea uzalishaji na kukuza kipato chenu,”alisema Mkurugenzi Dakawa.

Aidha aliwashauri kuiga mfano wa vikundi vya watu wenye ulemavu waliopewa mkopo na kumaliza marejesho yao yote ambapo kwa kufanya hivyo wanatoa fursa kwa  wengine kupata mikopo hiyo.

“Nasisitiza tuidhibiti mianya ya rushwa katika kupata mikopo hii kwa kuwa sisi sote ndio ambao tunapaswa kuijenga Kondoa ili kupata maendeleo na vyote vinawezekana tukiwa na amani na upendo miongoni mwetu,” alisisitiza Mkurugenzi Dakawa.

Awali akisoma taarifa ya utoaji wa Mikopo Afisa Maendeleo ya Jamii Irine Mosha amesema kuwa hadi kufikia sasa Halmashauri imetoa mikopo ya asilimia kumi ya mapato ya ndani yenye jumla ya shilingi milioni 196 kwa vikundi 55 na imekusanya kiasi cha zaidi ya shilingi milioni 80 ikiwa ni marejesho kutoka kwa vikundi hivyo.

Kwa upande wake Meneja wa Benki ya NMB Kondoa Francis Malile aliupongeza uongozi wa Halmashauri kwa kuongeza ukusanyaji wa mapato ambayo yanarudi kwa jamii kwa njia ya mikopo inayotolewa.

“Nawashauri mkatumie vizuri fedha hizi na  hizi ni kianzio tu mmepewa mkakuze mitaji yenu ili Kondoa iendelee na kwa sasa tumeanzisha akaunti ya PAMOJA  kwa ajili ya vikundi na haina makato yeyote tuitumie,” alisema Meneja Malile.

Halmashauri imetoa hundi yenye thamani ya shilingi milioni 39.5 ikiwa ni mikopo kwa robo ya tatu ya mwaka wa fedha 2019/2020 na imehudhuriwa na wakuu wa Idara, Meneja wa Benki ya NMB na wawakilishi wa vikundi vilivyopatiwa mikopo hiyo.