Milioni 400 za miradi zawekewa mikakati ya ukamilishaji

Tarehe iliyowekwa: November 12th, 2022

Fedha zilizotolewa kwa Halmashauri ya Mji Kondoa kwa ajili ya utekelezaji wa  miradi zaidi ya shilingi mlioni 400 zimewekewa mikakati ya pamoja kati ya menejimenti, Maafisa Elimu Kata, Wakuu wa Shule na Walimu Wakuu ili ikamilike kwa wakati na kutoa huduma iliyokusudiwa.

Mikakati hiyo imewekwa wakati wa kikao cha pamoja kilichofanyika katika ukumbi wa mikutano wa Halmashauri ya Mji hivi karibuni.

Akiongea wakati wa kikao hicho Mkurugenzi wa Halmashauri ya Mji Kondoa Ndg. Paul Sweya amesema ununuzi wa vifaa ufuate utaratibu wa manunuzi na mkanunue katika maduka yote ili miradi ya ikamilike kwa wakati na kuachana na tabia ya kusubiria vifaa sehemu moja hali itakayopelekea miradi kukwama na kutokamilika kwa wakati.

"Pia nawasisitiza suala la kutunza nyaraka za miradi kuanzia tangazo, mihatasari na malipo na tunafanya yote hayo ili muwe salama katika nafasi zenu na muwe wazalendo kama kuna watu wanapewa fedha ndogo ndogo muache tutekeleze miradi yetu hii na nitakuwa nafika kwenye miradi hiyo nawaomba tukamilishe kwa wakati,"amesema Mkurugenzi Sweya

Aidha amewataka kufanya kazi kwa pamoja katika maeneo yao kwa kuwashirikisha wanaowaongoza ili wawe na uelewa wa pamoja kuhusu mradi husika kwani kwa kufanya peke yao wanaweza kutofikia malengo ya ukamilishaji wa miradi hiyo.

Kwa upande wake Mhandisi wa Halmashauri ya Mji Kondoa Ndg. Jeremia Longido amewasisitiza viongozi hao kufanya manunuzi ya vifaa kufuata BOQ na kuchagua mafundi wenye uwezo wa kufanya kazi na wanaoweza kutafsiri ramani ya majengo na kuepuka kupandisha bei ya vifaa na kufanya mawasiliano panapokuwa na changamoto katika utendaji kazi.

Naye Mweka Hazina wa halmashauri Ndg. Rahabu Sanga amesema fedha zote zinazoletwa na serikali lazima zikaguliwe hivyo wanapaswa kuhakikisha nyaraka zote muhimu zinakuwepo na kuwahamasisha mafundi wafungue akaunti kwani malipo yao wanapaswa kulipwa wao wenyewe na si wasimamizi.

AfisaMaendeleo ya Jamii wa  Halmashauri  Ndg. Irene Mosha amewaasa wasimamizi hao kutumia bidhaa  zinazozalishwa na  vikundi  vya Wanawake, Vijana na watu wenye ulemavu waliopata  mkopo toka Halmashauri ili wapate fedha na waweze kurudisha marejesho nao kupata kipato kitakachowasaidia kujiinua kiuchumi.

Kwa upande wao mwakilishi wa walimu kutoka Shule ya Msingi Iyoli Mwalimu Keneth Bwasi ameishukuru serikali kwa kuwapatia fedha na kuahidi kununua bidhaa kutoka kwa vikundi na wafanyabiashara wa maeneo husika na kufanyakazi na kumaliza kwa wakati.

Kikao hicho kimefanyika kwa lengo la kuweka mikakati ya kukamilisha miradi ilipata fedha ambapo zaidi  ya shilingi milioni 400 zimeletwa kwa ajili ya umaliziaji wa madarasa, zahanati, maabara na ujenzi wa nyumba za walimu.