Miradi ya Wanufaika mikopo asilimia 10 Kondoa Mji yawavutia timu ya wakaguzi mkoa

Tarehe iliyowekwa: February 14th, 2025

Miradi inayotekelezwa na wanufaika wa mikopo ya asilimia 10 iliyotolewa na Halmashauri ya Mji Kondoa kwa kikundi cha vijana cha Mwangaza na kikundi cha mtu mwenye Ulemavu Hashim imewavutia timu ya mkoa iliyopita kukagua shughuli wanazofanya kutokana na ilivyowasaidia kuongeza kipato chao.

Akiongea kiongozi wa msafara huo ambaye ni Mganga Mkuu wa Mkoa wa Dodoma Dkt. Thomas Rutachinzibwa amesema amevutiwa na jinsi vikundi hivyo vinavyozalisha bidhaa ambazo zinaonekana na kuwataka wanufaika hao kuongeza bidi katika uzalishaji ili wakuze mitaji yao na kufanya vitu vikubwa zaidi.

“Kikundi cha Mwangaza ni vijana watupu mnaozalisha fenicha hongereni tuna Imani mnapata kazi nyingi sana kwasasa kama utengenezaji wa madawati na viti na meza kwa kuwa serikali inatoa fedha nyingi za utengenezaji wa fenicha hizo na hadi mlipofikia hapa naamini mtafika mbali zaidi,”amesema Dkt.

Aidha amempongeza Ndg. Kwa kuanzisha mradi wa mashine ya kusaga ambayo inafanya vizuri na inamwingizia kipato na kutaka awe mfano kwa watu wengine wenye ulemavu kwa kuwapa uzoefu wake ili waondokane na dhana za kuwa ukiwa mlemavu lazima uwe ombaomba.

“Kuna watu wengine ni wazima kabisa lakini hawajafanikiwa kufanya mambo makubwa kama haya nakupongeza sana na nashauri uombe mkopo mwingine ili uweze kufungua miradi mingine mingi zaidi ambayo itasaidia pia kuwamotisha wengine na ajira kutengeneza nafasi za ajira kwa wengine”amesisitiza Dkt.

Akiongea kwa upande wake Ndg. Hashim Hassan ameishukuru Halmashauri kwa kumuwezesha ambapo kwa mara ya kwanza walimuwezesha shilingi milioni tatu ambazo zilimsaidia kuanzisha mradi wa mashine ya kusaga na kukoboa ambao unafanya vizuri hadi sasa kwa kumuingizia kipato cha kuendesha maisha yake.

“Nimeomba tena mkopo kwa Halmashauri ili uweze kunisaidia kununua gari la kusambaza unga nitakaozalisha ambapo kwasasa naona kama naibiwa ila nikiwa na gari nitaweza kupanda nami na kushiriki kwenye usambazaji, lakini kwasasa nimenunua mashine ya kufyatua matofali ya kisasa itakayoanza kazi muda si mrefu,”amesema Ndg.

Kwa upande wake Kaimu Mkurugenzi wa Halmashauri ya Mji Kondoa Ndg. Irene Mosha ameiambia kamati kuwa vikundi hivyo ni kati ya vinavyofanya vizuri kwa kuwa walishakopeshwa awali na wakarejesha bila changamoto zozote na wameomba tena na fedha zimeshawekwa benki.

“Huyu Hashim pia ni mtaalam anayetusaidia sana kwenye masuala ya mifumo kwa kuwaelekeza wanavikundi mbalimbali sababu hapa pia anatoa huduma ya mtandao na amesajiliwa kwenye mfumo wa manunuzi wa Nest Pamoja na kikundi cha Mwangaza ili wapate kazi za serikalini,”amesisitiza Ndg. Irene