Mkurugenzi akutana na watendaji kuweka mikakati ya mapato 2024/2025

Tarehe iliyowekwa: July 16th, 2024

Mkurugenzi wa Halmashauri ya Mji Kondoa Ndg. Said Majaliwa amefanya kikao cha kimkakati  na Watendaji wa Kata na Mitaa kwa ajili ya kufikia malengo ya ukusanyaji mapato yaliyowekwa ikiwa ni mwanzoni mwa mwaka mpya wa fedha 2024/2025. 

Kikao hicho kimefanyika katika ukumbi wa mikutano wa Halmashauri ya Mji ambapo pia umehudhuriwa na Wakuu wa divisheni za Biashara, Kilimo na Mifugo, Utawala na Utumishi na vitengo vya Fedha, Mazingira, Huduma za Sheria na TEHAMA.

Akiongea katika kikao hicho Mkurugenzi amewataka watendaji hao kuhakikisha wanakusanya mapato bila kuwabugudhi wananchi ikiwa ni pamoja na kutoa elimu kwa wafanyabiashara kuhusu tozo za serikali. 

Aidha amewataka watendaji hao kuelewa majukumu yao katika utekelezaji wa kazi zao za kila siku katika maeneo yao na kuhakikisha kila siku wanakusanya ushuru au kila wiki ili kufikia malengo yaliyowekwa kwenye bajeti ya 2024/2025.

"Nawaomba sana mzitunze na kuzilinda mashine za kukusanyia mapato hizo ni kama silaha lakini pia mjue idadi yake katika maeneo yenu kwa namba na kuzikagua kila siku ili tusiwe na mashine feki katika maeneo yetu msipofanya hivi ntajua nyie pia ni sehemu ya ubadhilifu utakaofanyika" amesema Mkurugenzi Majaliwa. 

Ameendelea kuwasisitiza kutoa taarifa za changamoto watakazokutana nazo wakati wa kukusanya mapato ili zipatiwe ufumbuzi na kuahidi kutoa motisha kwa watendaji watakaofanya vizuri kwenye ukusanyaji wa mapato kila mwezi. 

Hata hivyo amewasihi kuendelea kutoa elimu kwa wananchi juu ya umuhimu wa kujiandikisha katika daftari la kudumu la wapiga kura na kujiandikisha kwa ajili ya uchaguzi wa serikali za mitaa utaofanyika mapema mwaka huu.

Kwa upande wao wakuu wa divisheni na vitengo waliohudhuria kikao hicho wamesisitiza suala la ukusanyaji wa mapato katika nyanja zote ikiwemo kukusanya fedha za taka ili zisaidie kuuweka mji katika hali ya usafi.