Mkurugenzi apongezwa kwa ujenzi wa zahanati kwa mapato ya ndani

Tarehe iliyowekwa: February 27th, 2025

Mkurugenzi wa Halmashauri ya Mji Kondoa Ndg. Said Majaliwa amepongezwa na Dkt. Rashid Mfaume ambaye ni Mkurugenzi wa Idara ya Afya, Lishe na ustawi wa jamii kutoka OR- TAMISEMI kwa kutenga fedha za mapato ya ndani shilingi milioni  77,626,869 na kujenga Zahanati ya Ausia ili kuwahudumia wananchi wa eneo hilo.

Dkt. Mfaume ametoa pongezi hizo alipotembelea Zahanati ya Ausia iliyopo katika Halmashauri ya Mji wa Kondoa na kusema kuwa wamezunguka halmashauri nyingi zenye mapato makubwa lakini bado wameshindwa kutenga mapato ya ndani na kujenga Zahanati.

" Halmashauri ya Mji Kondoa ina mapato kidogo sana, hata bilioni 2.5 hayafiki lakini Mkurugenzi amefanikiwa kutenga mapato ya ndani na kujenga Zahanati, kwa kweli nampongeza sana" amesema Dkt.Mfaume

Dkt.Mfaume akiwa na wataalamu wenzake kutoka OR -TAMISEMI akiwemo Mganga Mkuu wa mkoa wameanza ziara ya kukagua huduma za afya, lishe, na ustawi wa jamii katika Halmashauri za mkoa wa Dodoma.

Pia Mkurugenzi huyo amewasihi wasimamizi na watumishi kuhakikisha thamani ya fedha inazingatiwa katika utekelezaji wa miradi ya ujenzi wa sekta ya afya ili kuwezesha wananchi kupata huduma iliyo bora zaidi.

"Serikali imekuwa ikitafuta fedha mbalimbali kwa ajili ya ujenzi wa vituo vya afya ili kuboresha huduma kwa wananchi, hivyo ni muhimu kwa wasimamizi na watendaji kuzingatia ubora na ufanisi katika utekelezaji wa miradi hiyo" amesisitiza Dkt.Mfaume

Kwa upande wake Mkurugenzi wa Halmashauri ya Mji Kondoa Ndg.Said Majaliwa ameshukuru kwa ujio wa ugeni huo na kuahidi kufanyia kazi baadhi ya changamoto ambazo zimeibuliwa na wataalam hao.

Dkt. Mfaume na wataalamu wenzake wamefanikiwa kutembelea  kituo cha Afya Kingale, Zahanati ya Ausia, Kituo Cha Afya Serya pamoja na Hospitali ya Mji Kondoa ambapo wametoa maelekezo ya kutatua changamoto zilizopo ili kutoa huduma zilizo bora lakini pia wamepongeza kazi nzuri inayofanywa na watumishi wa Hospitali ya Mji Kondoa.