Mkurugenzi Kondoa Mji afanya hafla kuwaombea wanafunzi darasa la saba 2025

Tarehe iliyowekwa: September 4th, 2025

Mkurugenzi wa Halmashauri ya Mji Kondoa Ndg.Said Majaliwa ameandaa hafla ya chakula cha pamoja kwa wanafunzi wa darasa la saba wanaotarajiwa kufanya Mitihani yao ya Taifa tarehe 10 na 11 mwezi wa 9, mwaka 2025.

Tukio hilo la chakula cha pamoja limeambatana na maombi maalumu kwa ajili ya kuwaombea wanafunzi hao ikiwa zimebaki siku chache kabla ya kufanya mtihani wao wa Taifa.

Hafla hiyo imefanyika katika shule zote 35 za msingi zenye wanafunzi wa darasa la saba kwa mwaka 2025.

Akiongea, katika shule ya msingi Ubembeni ambapo alikuwa mgeni rasmi,  Mkurugenzi wa Halmashauri ya Mji Kondoa Ndg.Said Majaliwa  amesema Halmashauri imetenga siku ya tarehe 4 mwezi Septemba, mwaka 2025 kuwa ni ya  wazazi, walimu, wanafunzi, kamati za shule, viongozi wa mtaa na kata pamoja na viongozi wa dini kula chakula cha pamoja na kuwaombea wanafunzi wa darasa la saba ambao wiki lijalo watafanya mtihani wa Taifa.

Jumla ya wanafunzi 1881 wakiwemo wavulana 908 na wasichana 973 wa darasa la saba wa mwaka 2025 katika Halmashauri ya Mji Kondoa, wanategemewa kufanya mtihani wao wa Taifa.

Akiongea na wanafunzi hao Mkurugenzi wa Halmashauri ya Mji Kondoa  amemshukuru Afisa Elimu Msingi Bi Lucy Mbolu kwa maandalizi ya  tukio hilo muhimu.

 Aidha, Mkurugenzi amewashukuru wazazi kwa kufika shuleni hapo na kujumuika na watoto wao kupata chakula Cha pamoja.

"Niwashukuru sana wazazi wenzangu, Urithi pekee unaodumu kwa mtoto ni elimu pekee" Said Majaliwa.

Kabla ya kuanza kupata chakula hicho wanafunzi hao wameombewa na viongozi wa madhehebu  mbalimbali ya dini Ili kuweza kufanya vizuri katika mtihani wao wa Taifa.

Hafla hiyo imehudhuriwa na watu mbalimbali wakiwemo viongozi wa dini pamoja na viongozi wa serikali.

Majaliwa amewasisitiza wanafunzi hao kuendelea  kumuomba mwenyezi Mungu Ili waweze kufanya vizuri zaidi katika mitihani yao.

"Sisi kama Halmashauri tutahakikisha tunazingatia suala la salama wenu ili muweze kufanya mtihani wenu kwa amani na utulivu" Majaliwa.

Majaliwa pia ametumia fursa hiyo kuwaambia wananchi kujitokeza kwa wingi kupiga kura pindi tarehe ya Uchaguzi itakapowadia mwishoni mwa mwezi wa kumi mwaka, 2025.