Mkurugenzi Kondoa Mji ateta na Walimu Wakuu

Tarehe iliyowekwa: December 24th, 2020

Walimu wakuu wa Halmashauri ya Mji Kondoa wameaswa kufanya kazi kwa ubunifu, nidhamu, kutambua mamlaka zao na zinazowaongoza ikiwa ni pamoja na kufuatilia masuala ya kitaaluma kwa wanafunzi na walimu ili kuongeza ufaulu katika shule wanazoziongoza.

Ushauri huo umetolewa na Mkurugenzi wa Halmashauri ya Mji Kondoa Msoleni Dakawa wakati wa ufunguzi wa kikao cha Walimu Wakuu kilichofanyika katika ukumbi wa Kituo Cha Walimu Kondoa Mjini hivi karibuni.

"Nikiwaangalia wote hapa mna uwezo mkubwa sana na mnaweza kufanya makubwa katika shule zetu ila hamjaamua kujituma na sijui kwanini mnafanya hivyo sababu ninachojua mimi wakati wa kujituma kwenu ni sasa wakati mkiwa viongozi na si mkishatolewa,"amesema Dakawa

Aidha ameongeza kuwasihi kuendelea kufanya kazi kwa nguvu zote na kuacha alama kwa kuwa kazi wanazofanya zina mkono wa Mungu sababu wanawahudumia watoto ambao wanapaswa kuwakumbuka kwa mazuri wanayowafanyia na si mabaya.

"Nawaambieni hawa maafisa elimu wametokea hukohuko kwenye ualimu hakuna aliyezaliwa na kuwa afisa elimu ila wamefika hapo kwa ajili ya kujituma kufanya kazi na nidhamu kwa kuwa kufanya kazi kwa bidii siku zote kunalipa,"amesisitiza Mkurugenzi Dakawa

Hata hivyo amewataka kufanya kazi kwa kuunganisha walimu wanaowaongoza na kuacha tabia za kuwa miungu watu na ikitokea Mwalimu kakosea wamwite na kumueleza mapungufu yake ili asirudie makosa kinyume na kufanya hivyo watatengeneza makundi na kuleta migogoro katika taasisi.

"Baadhi yenu mnaletewa miradi mnashindwa kuisimamia hii siyo sawa kwa kuwa serikali inatoa fedha nyjngi, lakini mkumbuke nyie mna posho za madaraka hivyo zitumieni kwa kufanya kazi kwa kujituma lengo ni moja kuhakikisha Halmashauri yetu inafaulisha wanafunzi wote,"amesema Mkurugenzi Dakawa

Aidha ameendelea kuwataka kifanyakazi kwa kushirikiana na viongozi wa mitaa ili kuhakikisha wanakamilisha utengenezaji wa madawati ili kuhakikisha hadi ifikapo Januari 11 hakuna mwanafunzi anayekaa chini.

Akiongea awali Afisa Elimu Msingi Halmashauri ya Mji Kondoa Mwalimu Hassan Mtamba amewaambia mabadiliko ya vituo vya kazi yaliyofanyika yametokea kwaajili ya kuboresha utendaji kazi na si vinginevyo.

"Mlioteuliwa mjue mna jukumu zito mbele yenu na mmepewa nafasi hizo kwa kuwa mmefanya vizuri na mmeonekana mnafaa hivyo ni wakati wenu kufanya kazi ili kumthibitishia aliyewateua kuwa mlistahili nafasi hizo,"amesisitiza Mwalimu Mtamba.