Mkurugenzi Majaliwa aagiza miradi kukamilika ifikapo Mei 31

Tarehe iliyowekwa: May 8th, 2025

Mkurugenzi wa Halmashauri ya Mji Kondoa Ndg. Said Majaliwa amewataka Wakuu wa Shule wanaotekeleza miradi ya ujenzi wa miundombinu katika shule zao kukamilisha miradi hiyo ifikapo Mei 31,2025.

Ametoa maagizo hayo wakati wa kikao kati yake na Wakuu wa Shule za Sekondari za Tura Day, Bicha, Dilai, Mto Bubu, Kolo, Serya na Bolisa.

"Miradi mingi ipo hatua za mwisho kabisa na vitu vichache kama milango ya vyooni, samani na marekebisho madogo madogo tuvifanyie kazi ili miradi ikamilike na kuanza kutumiwa kama ilivyokusudiwa",amesema Mkurugenzi Majaliwa

Ameongeza kwa kuwataka kuwa makini na matumizi ya fedha zilizotolewa kwa kuhakikisha miradi inakamilika kama ambavyo miradi kama hiyohiyo imekamilika kwa fedha zilizotolewa ndani ya Halmashauri.

Aidha amewapongeza kwa kusimamia miradi hiyo ambayo imetekelezwa kwa kiwango kizuri na kuwavutia wageni waliotembelea miradi hiyo hivyo waongeze bidii katika usimamizi ili ikamilike ifikapo Mei 31.

"Kwa kweli nimpongeze Mkuu wa Shule ya Mto Bubu anayesimamia ujenzi wa Shule ya Sekondari Suruke umejitahidi sana kusimamia kila kiongozi aliyefika pale amesifia majengo sasa tukamilishe maabara zilizobakia ikiwepo mradi wa Amali Kingale ambao pia ulisifiwa na wajumbe wa kamati ya ALAT mkoa wa Dodoma,"amesisitiza Mkurugenzi Majaliwa

Ameongeza kwa kuwataka kuhakikisha wanajikagua na kuweka vizuri nyaraka zote za malipo ya manunuzi, mafundi na nyaraka za utoaji vifaa katika stoo zao ili kuepusha upotevu wa nyaraka hizo wakati wa ukaguzi.

Hata hivyo amewataka miradi kukamilika ili kuanza kutekeleza miradi iliyopata fedha kwa ajili ya ukamilishaji wa maabara ambapo wanatakiwa kukamilisha ujenzi wake kabla ya Juni 30,2025.

Shule za Sekondari Tura Day, Ula, Suruke, Amali Kingale, Bicha, Gubali, Dilai na Serya ambao walipatiwa fedha zaidi ya shilingi bilioni 1.5 kwa ajili ya ujenzi wa madarasa, matundu ya vyoo na mabweni ikiwa ni fedha kutoka Serikali Kuu na wahisani na ipo ambapo mingine imekamilika na mingine ipo asilimia 98 za utekelezaji.