"Mpeni ushirikiano Mkurugenzi Majaliwa" - Mkurugenzi Sweya

Tarehe iliyowekwa: March 17th, 2024

Mkurugenzi wa Halmashauri ya Wilaya ya Mbeya Ndg. Paul Sweya amewashauri Wakuu wa Divisheni na Vitengo katika Halmashauri ya Mji Kondoa kumpa ushirikiano Mkurugenzi Said Majaliwa aliyehamishiwa katika Halmashauri hiyo ili kurahisisha utendaji kazi wake.

Ushauri huo ameutoa wakati wa makabidhiano ya ofisi kati ya wakurugenzi yaliyofanyika katika ukumbi wa mikutano wa Halmashauri ya Mji na kuhudhuriwa na Mwenyekiti wa Halmashauri ya Mji Kondoa Mhe. Mohamed Kiberenge, Makamu Mwenyekiti Mhe. Zainabu Haroub na Wakuu wa Divisheni na Vitengo.

“Kipo kibaya nilichowafanyia na kipo kizuri nilichowafanyia mi si malaika msiniwekee doa nikaenda na kinyongo mnisamehe kwa dini zenu wakristo na waislam nami nitawaombea huko ninakokwenda Mkurugenzi nakukabidhi watumishi wote wapo vizuri ila muda utaongea,”amesema Mkurugenzi Sweya

Aidha amewaomba wakuu wa divisheni na vitengo kutomuharibu Mkurugenzi na kuwaomba kumsaidia kwa kufanya kazi kwa ushirikiano naye kwa kuwa ana safari ndefu katika uongozi na baadhi ya watumishi hawana tabia ya kuwasaidia wenzao.

Akifungua kikao hicho Makamu Mwenyekiti wa Halmashauri ya Mji Kondoa Mhe. Zainabu Haroub amewataka Wakuu wa Divisheni na Vitengo kwa nafasi walizonazo kumueleza Mkurugenzi changamoto wanazokabiliana nazo ili kuzitatua pamoja na kusonga mbele.

“Mkurugenzi tunayo miradi mingi ipo ambayo imefanyika na ipo ambayo inaendelea kufanyika lakini nina imani viongozi hawa watakupa ushirikiano utaifahamu miradi yote na changamoto zilizopo katika miradi,”amesema Mhe. Zainabu

Kwa upande wake Mwenyekiti wa Halmashauri ya Mji Kondoa Mhe. Mohamed Kiberenge amesema kama Waheshimiwa Madiwani kwa kipindi chote wameishi na Mkurugenzi Sweya vizuri kwa kuwa aliweza kusimamia stahiki zao na kuhakikisha wanazipata kwa wakati na aliwamotisha kama watumishi wengine ikiwa ni pamoja na kuwasikiliza na kuwaheshimu.

“Mkurugenzi hawa ni watumishi wetu hakuna mbaya wote unaweza ukawafanya wakawa daraja la kwanza inawezekana wakaweza kushindana mbio tu ukawapanga katika madaraja na nawasihi watumishi fanyieni kazi suala la mapato sababu ndio kila kitu katika Halmashauri,”amesisitiza Mhe. Kiberenge

Mkabidhiano ya ofisi yamefanyika baada ya mabadiliko yaliyofanywa na Rais Mhe. Dkt. Samia Suluhu Hassan kwa kuwateua viongozi wapya na wengine kuwahamisha ambapo Halmashauri ya Mji Kondoa ameletwa Mkurugenzi Ndg. Said Majaliwa kutoka Halmashauri ya Jiji la Tanga na aliyekuwa Mkurugenzi Ndg. Paul Sweya kuhamishiwa katika Halmashauri ya Mbeya.