Mradibwa TACTIC fursa kwa Halmashauri na Wananchi Kondoa Mji

Tarehe iliyowekwa: February 10th, 2025

Kuanza kwa utekelezaji wa miradi itakayotekelezwa chini ya mradi wa uimarishaji miji (TACTIC) imeelezwa kuwa ni fursa muhimu kwa kukuza uchumi wa  Halmashauri na wananchi wa Kondoa Mji.

Hayo yanesemwa na Mkurugenzi wa Halmashauri ya Mji Kondoa Ndg. Said Majaliwa wakati akiongea na wataalam kutoka OR TAMISEMI na washauri wa  mradi huo waliofika kufanya usanifu wa miradi itakayotekelezwa katika Halmashauri ya Mji.

Amesema kuwa katika Halmashauri ya Mji miradi inayokwenda kutekelezwa ni ujenzi wa stendi ya kisasa, ujenzi wa soko la kisasa na ujenzi wa barabara za mitaa zenye urefu wa KM 6.

Aidha amesema kuanza kwa kazi hizo kutaleta fursa ya ajira kwa wananchi ambao watafanya kazi za ujenzi wa miradi hiyo lakini pia kutoa huduma mbalimbali kwa mafundi na wote wanaotekeleza miradi hiyo.

Aidha ameongeza kuwa kukamilika kwa miradi hiyo kutasaidia Halmashauri kukusanya mapato kwa urahisi lakini pia kupata soko ambalo ni la uhakika kwa wafanyabiashara wa namna zote ikiwa ni pamoja na wananchi kujiajiri kwa kufanya biashara mbalimbali.

Kwa upande wake Mwenyekiti wa Halmashauri ya Mji Kondoa Mhe. Mohamed Kiberenge amewashukuru Rais Dkt. Samia Suluhu Hassan na wataalam waliofika kwa ajili usanifu kwa kuona umuhimu wa miradi hiyo kuanza kwa kuwa wananchi walikuwa wakiisuburia kwa hamu.

Aidha amesema kuwa baraza la Waheshimiwa Madiwani lipo tayari kutoa ushirikiano wakati wote wa utekelezaji wa miradi hiyo muhimu ambayo inawagusa moja kwa moja wananchi.

Timu ya wataalam ya mradi wa uendelezaji miji imeongozwa na Mkurugenzi wa mradi huo Mhandisi Patrick Lujinya na wataalam wengine ambapo wamepata fursa ya kuzungukia barabara zote za mitaa zitakazojengwa, soko kuu na eneo la Stendi mpya ya Bicha na unatarajia kuanza mapema mwezi Julai 2025.

.