Mwenge wachangia ujenzi zahanati gereza la Kondoa

Tarehe iliyowekwa: July 27th, 2021

Mwenge wa Uhuru umeunga mkono juhudi za ujenzi wa Zahanati Gereza la Kondoa Mjini kwa kuchangia shilingi laki tatu na kuendesha harambee fupi kwa viongozi iliyopelekea kukusanya shilingi milioni 2.8.

Zoezi hilo limeongozwa na Mkimbiza Mwenge kitaifa LT. Josephine Paul Mwambashi wakati wa uwekaji wa jiwe la msingi katika mradi wa ujenzi wa Zahanati ya Gereza la Kondoa Mjini wakati wa mbio maalum za Mwenge wa Uhuru katika Wilaya ya Kondoa hivi karibuni.

"Nichukue nafasi hii kuwapongeza viongozi na watumishi wa gereza la Kondoa kwa kuamua kufanya jambo hili la kujenga zahanati kwani pamoja na kuwasaidia wao tu itaboresha afya za wananchi wote wa Kondoa,"amesema LT. Josephine

Aidha amesema anajua mradi huo unaenda taratibu kwa kuwa hawana chanzo cha uhakika cha fedha za ujenzi zaidi ya kutafuta kutoka maeneo mbalimbali ndio maana ameona ni vyema kupitia mbio hizo wakachangia kiasi cha fedha ili kumalizia mradi huo.

Kwa upande wake Mkuu wa Wilaya ya Kondoa Dkt. Khamis Mkanachi amewashukuru wakimbiza Mwenge kitaifa kwa kuwezesha upatikanaji wa fedha hizo za umaliziaji na kuweka jiwe la msingi na kwa upande wake atahakikisha anausimamia mradi huo ili ukamilike kwa wakati na kutoa huduma.

Akisoma taarifa ya mradi kwa niaba ya Mkuu wa Gereza Afande Kurwa Nasibu Mwakasikwa amesema mradi huo hadi kufikia hatua hiyo wametumia shilingi milioni 31 fedha zilizotokana na mapato ya zahanati ya sasa, nguvu za wananchi na wadau wa maendeleo.

Mwenge wa Uhuru umekimbizwa Wilaya ya Kondoa tarehe 27.7.2021 ambapo umezindua miradi mitatu na kuweka mawe ya msingi katika miradi miwili yenye jumla ya shilingi 893,238,921.30 na kwa mwaka huu kauli mbiu inasema" TEHAMA ni msingi wa taifa endelevu, itumie kwa usahihi na uwajibikaji".