NDALICHAKO AWAASA WANAFUNZI KUSOMA KWA BIDII

Tarehe iliyowekwa: April 24th, 2017

Waziri wa Elimu,Sayansi na Teknolojia Profesa Joyce Ndalichako amewataka Wanafunzi wa kidato cha Sita katika shule ya Sekondari ya Wasichana Kondoa kuhakikisha wanasoma kwa bidii na kuachana na mambo ambayo hayana tija kwa maisha yao.

Waziri Ndalichako amesema hayo wakati wa mahafali ya kidato cha Sita Shuleni hapo kuwa, Mitihani siyo muujiza na kuwa Mitihani ya ndani ya Shule huwa ni migumu tofauti na ile inayotoka nje ya Shule kama vile mtihani wa Taifa na mara zote maswali yanayoulizwa ni yale yale ambayo tayari Mwanafunzi anakuwa amejifunza Darasani.

Waziri Ndalichako amewaasa Wanafunzi hao kuhakikisha wanatumia Uhuru  wa Vyuoni vizuri pindi watakapochaguliwa kujiunga na Vyuo kwani wanapokuwa chuoni hakuna ulinzi au usimamizi kama ule wa kwenye Shule za Msingi na zile za Sekondari."napenda kuwasihi sana wanangu kuwa mnapokaribia kumaliza Elimu yenu hii ya Sekondari na kwenda kujumuika na jamii nendeni mkaendeleze nidhamu na matendo mema ambayo Walimu wenu wamewafundisha hapa Shuleni,msiende kujiingiza kwenye majanga ya ukimwi,dawa za kulevya,sitegemei muende mkapotoke kuweni Wazalendo na muwe mabalozi wazuri wa kuisemea nchi yenu "alisema Profesa Ndalichako.

kwa upande wake Mkuu wa shule hiyo Flora Nusu amemweleza Waziri baadhi ya changamoto zinazoikabili Shule hiyo kuwa ni upungufu wa Walimu wa masomo ya Sayansi ikiwemo Fizikia,Kemia,Biolojia,Hisabati.pia ukosefu wa ukumbi wa mikutaano,uchakavu wa miundombinu ya maji kwa ajili ya vyoo,uchakavu wa Nyumba za Walimu na ukosefu wa Kompyuta kwa ajili ya kujifundishia.

Imetolewa na:

Kitengo cha TEHAMA na Uhusiano

Halmashauri ya Mji kondoa.

24/04/2017