Nidhamu Yapaisha Chuo Cha Ualimu Bustani

Tarehe iliyowekwa: April 20th, 2018

Chuo cha Ualimu cha Bustani kilichopo Kondoa Mjini kimepongezwa kwa kutoa wahitimu wenye nidhamu hali inayopelekea kuongezeka kwa ufaulu wa wanafunzi wanaohitimu chuoni hapo.

 Hayo yalisemwa na Mkuu wa Wilaya ya Kondoa Mhe. Sezaria Makota wakati wa mahafali ya chuo hicho yaliyofanyika katika ukumbi wa Chuo uliopo chuoni hapo hivi karibuni.

Alisema kuwa wanafunzi wa mwaka jana waliofanya mtihani wa kumaliza chuo walifaulu wote hivyo hana hofu hata wanafunzi wanaomaliza mwaka huu na kuagwa wote watafaulu sababu ndio moja ya sifa kuu ya chuo hicho kutokana nan a uadilifu wa wanafunzi wake.

Aliongeza kuwa chuo hicho ni kikubwa na chunye sifa nyingi hivyo wanafunzi wanaohitimu wasiende kukaa tu na kusubiria ajira badala yake wakatumie elimu ya ujasiriamali waliyoipata shuleni hapo kujiajili na kujipatia kipato.

Aidha aliwaahidi kushirikiana nao na Mganga Mkuu ili kuhakikisha Zahanati ya chuo hicho inasajiliwa na kuanza kutoa huduma kwa wanachuo na wananchi wa maeneo ya jirani kama walivyoomba katika risala yao.

Awali katika risala ya wanafunzi wanaoondoka walizitaja changamoto za chuo hicho kuwa ni pamoja na ukosefu wa vitabu vya kiada na ziada, upungufu wa kompyuta na upungufu wa nyumba za watumishi wa shule wakiwemo wakufunzi na dereva.

Mahafari ya Chuo Cha Ualimu Bustani yamefanyika hivi karibuni ambapo jumla ya wanafunzi 118 walihitimi wakiwemo wanafunzi 58 wa Astashahada ambapo haya ni mahafari ya 38 na wanafunzi 60 wa Stashahada ambao ni mahafali ya 4 toka kuanzishwa kwa chuo hicho mwaka 1974.