"Nina imani nanyi kupata walengwa wenye sifa" - DC Makota

Tarehe iliyowekwa: April 19th, 2021

Mkuu wa Wilaya ya Kondoa Mhe.Sezaria Makota amesema ana imani na waheshimiwa madiwani wa wilaya ya Kondoa kuwa wataenda kusimamia vizuri zoezi la uibuaji wa kaya maskini ili kupata kaya zenye sifa zinazotakiwa.

Kauli hiyo ameitoa wakati wa kikao cha kujenga kuelewa wa mradinwanTASAF III awamu ya pili kilichofanyika katika ukumbi wa Kondoa Irangi hivi karibuni.

"Naomba nisisitize hapa Leo tumeshirikishwa wote kwa kupatiwa mafunzo ya uelewa wa kinachokwenda kutekelezwa hivyo msiende kuchagua walengwa kwa upendeleo na kujuana la mjue ikitokea lolote kinyume na utaratibu ni la wote," amesema Mhe. Makota

Aidha amewataka washiriki kuwa waadilifu wanapoenda kutekeleza mradi ili malengo yake yatimie na kuwasisitiza waheshimiwa madiwani kwenda kuwa mabalozi wa kuwahamasisha walengwa kujiunga na Mfuko wa Afya ya Jamii (CHF) ili wapate huduma za afya wanapougua.

Akiongea awali mwakilishi wa Mkurugenzi wa TASAF Japhet Boaz amesema mradi huo umekuja kwasasa baada ya kufanya zoezi la uhakiki ambalo liliwaondoa walengwa wasio na sifa ikiwemo waliofariki na waliohama.

" Mradi huu kwasasa unaenda kutekelezwa katika Halmashauri zote Tanzania bara na katika mikoa yote ya Zanzibar katika vijiji na mitaa yote tofauti na awali ambapo baadhi ya vijiji na mitaa havikuwemo kwenye mpango," amesema Japhet

Ameendelea kueleza kuwa mradi pia umeboresha huduma na kuzisogeza karibu kwa jamii katika masuala ya elimu na afya katika makundi tofauti ya watu ambao ni wanaoishi katika hali duni, watoto chini ya miaka mitano, wajawazito na watu wenye ulemavu.

"Mradi pia utatoa ajira kwa walengwa kwa kufanya kazi katika miradi ya kijamii na kulipwa fedha lakini kubwa tujue kuwa watakaowaibua walengwa wasio na sifa watawajibishwa," amesisitiza Japhet

Kwa upande wake Mkurugenzi wa Halmashauri ya Mji Kondoa Msoleni Dakawa amesema kuwa wameyapokea yote yaliyowasilishwa na watayayekeleza na kuyasimamia kwa kuwa wao ndio waliopo kwenye jamii kwa manufaa ya wananchi wa Kondoa.

Kikao cha kujenga uelewa wa mradi wa TASAF III awamu ya pili kimefanyika kwa kuwakutanisha kamati ya ulinzi na usalama, waheshimiwa madiwani, wakuu wa Idara na vitengo wa Halmashauri za Mji Kondoa na Wilaya ya Kondoa ambapo utawafikia watu milioni saba katika Halmashauri zote za Tanzania bara.