Ushirikiano wasisitizwa ujenzi wa madarasa ya pochi la mama

Tarehe iliyowekwa: October 5th, 2022

Ushirikiano kati ya Wakuu wa Shule na Ofisi ya Mkurugenzi umesisitizwa wakati wa utekelezaji wa ujenzi wa madarasa 9 yenye thamani ya shilingi milioni 180 fedha kutoka serikali kuu maarufu kama pochi la mama.

Msisitizo huo umetolewa na Mkurugenzi wa Halmashauri ya Mji Kondoa Ndg. Paul Sweya kwa Wakuu wa Shule wakati wa kikao cha kujadili namna ya kutekeleza mradi wa ujenzi wa madarasa hayo kilichofanyika katika ukumbi wa mikutano wa Halmashauri ya Mji.

“Changamoto zikitokea mtoe taarifa mapema msisubiri hadi sisi tuje huko kama viongozi ndio tuwalalamikie nyie tutawavunja moyo kwanza lakini pia tutatengeneza gap la uhusiano mi nakuja na kuanza kufoka unajisikiaje wewe wakati kumbe umefanya kazi kubwa ila  tu sikuwa na taarifa,”amesema Mkurugenzi Sweya

Aidha amesema mwisho wa utekelezaji wa mradi huo ni Desemba 15 ikiwa ni maagizo ya Mhe. Rais na yeye yupo kwa ajili ya kutekeleza maagizo ya viongozi na hatakuwa Mkurugenzi wa maelezo bali Mkurugenzi Mtendaji wakati wote wa utekelezaji wa mradi huo.

“Mmetekeleza miradi hapa karibuni naamini mtatumia uzoefu wa miradi ya nyuma penye mapungufu mliona na nasisitiza thamani ya fedha ionekane na vifaa vikaagizwe kwa mujibu BOQ na mradi uishe na mradi huu si wenu peke yenu tutakuwa pamoja na sisi tunawaamini na kuwaheshimu na utaalam wenu,”amesisitiza Mkurugenzi Sweya

Hata hivyo amewataka Wakuu wa Shule kuepuka kuongeza bei ya vifaa na kujiingiza katika kupata fedha kutoka kwa wazabuni kwa kuwa fedha hizo zitafuatiliwa na kuagiza vifaa kununuliwa kwa pamoja ili kuokoa fedha na muda.

Akiongea katika kikao hicho Kaimu Mweka Hazina Ndg. Rahabu Sanga amewataka Wakuu wa Shule kuandaa mapema nyaraka zote za mradi wakati wa kuomba malipo na kuwasimamia mafundi watakaopata kazi ili wafungue akaunti na malipo yao yaingie kwenye akaunti zao moja kwa moja na si walimu kwenda kuwalipa.

Kaimu Mhandisi Ujenzi Mhandisi Jeremiah Longido amewataka Wkuu wa Shule kuajiri mafundi wenye uwezo na wanaofuata maelekezo wanayopewa na kuongeza  kuwa kwa mujibu wa mpangokazi uliotolewa na ofisi ya Mkurugenzi madarasa yatakamilika ifikapo Desemba mosi,2022.

Akiongea kwa niaba ya Wakuu wa Shule Mwalimu Zakayo Simanjiro amemshukuru Mhe. Rais kwa kuwapatia fedha hizo za ujenzi wa madarasa na kuahidi kwenda kutekeleza mradi wa madarasa kwa viwango vinavyotakiwa.

Halmashauri ya Mji Kondoa imepata fedha shilingi milioni 180 kutoka serikali kuu kwa ajili ya ujenzi wa madarasa 9 na yatajengwa katika Shule za sekondari za Ula, Bicha, Gubali, Kwapakacha na Dilai.