Ofisi ya Msajili wa Vyama vya Siasa yazungumza va vyama Kondoa kuelekea Uchaguzi Serikali za Mitaa

Tarehe iliyowekwa: October 22nd, 2024

Viongozi kutoka Ofisi ya Msajili wa Vyama vya Siasa nchini wamekutana na viongozi wa vyama vya siasa vilivyopo Wilayani Kondoa kwa lengo la kutoa mafunzo mafupi na ya muhimu kuelekea uchaguzi wa Serikali za Mitaa.

Mafunzo hayo yametolewa kwa Wenyeviti na Makatibu wa vyama ili kuwapatia elimu kuhusu masuala ya vitu vya kufanya, kuepuka na sheria mbalimbali zinazohusiana na masuala ya vyama vya siasa ikiwa ni pamoja na wajibu wa ofisi ya Msajili wa vyama vya siasa kwa vyama.

Akiongea katika mafunzo hayo mwakilishi kutoka Ofisi ya Msajili wa Vyama vya Siasa Ndg. Peter Lyimo amesema kuelekea uchaguzi wa Serikali za Mitaa vyama vinapaswa kuheshimu sheria, kanuni na miongozo mbalimbali ili kuufanya uchaguzi huo uwe wa amani na utulivu.

"Sisi leo tumeleta elimu hii kwenu viongozi tunaamini na nyie mtakwenda kuwapa wanachama wenu elimu hii ilinwawe na uelewa mpana sana kuhusu masuala ya kisiasa lwa kufuata sheria za nchi, katiba na kanuni mbalimbali na kuepuka kufanya mambo ambayo yataharibu sura ya chama husika,"amesema Ndg. Lyimo

Ameongeza kwa kuvitaka vyama vya siasa Kondoa kuhakikisha wanafuata utaratibu uliowekwa panapotokea ukiukwajibwa sheria kwenye masuala ya uchaguzi na kuwapatia wao taarifa ili kuboresha penye changamoto kwa pamoja kwa kuwa wao ni walezi wa vyama.

Akiongea katika mafunzo hayo Msimamizi Msaidizi wa Uchaguzi Halmashauri ya Mji Kondoa Ndg. Sekela Mwasubila ameishukuru Ofisi ya Msajili wa Vyama vya Siasa kwa kuona umuhimu wa kuja kutoa mafunzo kwa vyama vya siasa Kondoa na kuvitaka vyama kuwa na amani wakati wote wa kipindi cha maandalizi ya uchaguzi kwa kuwa hakuna utaratibu, kanuni na sheria zitakazokiukwa.

Mafunzo hayo yamehudhuriwa na wawakilishi wa vyama vya siasa kutoka Chama Cha Mapinduzi, CHADEMA, CUF na ACT Wazalendo na wawakilishi kutoka Ofisi ya Msajili ni Ndg.Peter Lyimo na Ndg. Aneja Mwakanyamale.