Pendekezo Ilani ya Uchaguzi 2020-2025 kuwanufaisha wafugaji Dodoma

Tarehe iliyowekwa: February 5th, 2020

Kamati ya Siasa Mkoa wa Dodoma imeliweka suala la kuongeza thamani mazao ya mifugo katika Ilani ya Uchaguzi 2020-2025 kutokana na kuongezeka kwa ufugaji mkoani humo.

Kauli hiyo ilitolewa na Mwenyekiti wa Chama Cha Mapinduzi Mkoa wa Dodoma Mhe. Godwin Mkanwa wakati wa ziara ya ukaguzi wa miradi iliyotekelezwa katika Wilaya ya Kondoa.

“Tunapenda Dodoma kiwanda kikubwa cha nyama kijengwe, kiwanda kikubwa cha ngozi kijengwe ili ngozi zote zinazotokana na machinjio hizi basi ziweze kupata soko lake kwa kuwa na sisi ni wafugaji wakubwa katika mkoa,”alisema Mhe. Mkanwa.

Aliongeza kuwa uwepo wa kiwanda kikubwa cha nyama kutasaidia kuiongezea thamani kwa kuifungasha vizuri na kupata soko la uhakika jambo ambalo litawafanya wafugaji wapate maendeleo na kujiinua kiuchumi.

Aidha alimpongeza Mkuu wa Wilaya ya Kondoa Mhe. Sezaria Makota kwa usimamizi mzuri wa miradi ndani ya wilaya ya Kondoa na kusema kuwa katika mradi wa machinjio katika mnada wa Bicha walioutembelea Kondoa Mji thamani ya fedha iliyotumika inaonekana na inaridhisha.

Awali akisoma taarifa ya mradi wa uboreshaji wa miundombinu katika mnada wa Bicha Kaimu Afisa Mifugo Dennis Moshi alisema kuwa mradi huo umejengwa na wadau wa maendeleo shirika la LIC ambao walitoa shilingi milioni 51 na Halmashauri kuchangia shilingi milioni 2.

“Mradi huu umelenga katika kuboresha mazingira ya kibiashara ya mifugo, kuimarisha ukusanyaji wa mapato na kuimarisha ulinzi wa mifugo ya wafanyabiashara wa mifugo katika mnada ikiwa ni pamoja na kusogeza huduma kwa jamii inayozunguka kata za Halmashauri ya Mji na wilaya za jirani za Kondoa na Chemba,”alisisitiza Bwana Dennis.

Kamati ya siasa mkoa wa Dodoma ipo katika ziara ya kutembelea miradi ndani ya mkoa wa Dodoma na iliambatana na baadhi wajumbe wa kamati kuu toka taifa na mkoani ikiongozwa na mkuu wa Wilaya ya Kondoa Mhe. Sezaria Makota.