Prof. Ndalichako awafunda wanachuo cha Bustani Kondoa

Tarehe iliyowekwa: June 17th, 2020

Waziri wa Elimu, Sayansi na Teknolojia Profesa Joyce Ndalichako amewataka wanachuo wa Chuo Cha Ualimu Bustani Wilaya ya Kondoa kuwa wazalendo kwa kuipenda na kuitetea nchi ya Tanzania ili iweze kufikia uchumi wa kati.

Ujumbe huo ameutoa wakati akiongea na wanachuo wa Chuo hicho alipofanya ziara ya kutembelea chuoni hapo hivi karibuni kujionea utendaji wa kazi wake na ukarabati wa chuo unaoendelea chuoni hapo.

“Jana tumemsikiliza Mhe. Rais wakati akisoma utekelezaji wa serikali ya awamu ya tano kwa upande wa elimu makubwa yamefanyika nyie mmekuwa mashuhuda ikiwemo elimu bure ambapo kila mwezi zaidi ya shilingi bilioni 24 hutolewa, uboreshaji wa miundombinu ya madarasa na mabweni katika vyuo na shule kongwe hata hapa shuleni mmeona ukarabati unaoendelea ambapo zaidi ya shilingi milioni 874 zimeletwa,”alisema Prof. Ndalichako.

Aidha amewakumbusha kuwa uzalendo ni pamoja na kuyasema mazuri yanayofanywa na serikali ikiwemo ujenzi wa madaraja, umeme wa REA, ujenzi wa vituo vya afya pamoja na ujenzi wa barabara za lami na kuwataka kuacha kurubuniwa na wanaoisema vibaya serikali.

“Tunaelekea kwenye uchaguzi Mkuu kuweni makini msikubali kutumiwa vibaya na watu wasiyoitakia mema nchi mkae na kuthamini mambo na siku zote wanasema akili za kuambiwa changanya na za kwako tutunze amani, umoja na mshikamano uliopo ambao uliasisiwa na viongozi wetu waliotangulia mbele za haki,”alisisitiza Prof. Ndalichako.

Hata hivyo aliwasihi kutoichezea amani iliyopo kwa kuwa nchi zingine wanahangaika kuirejesha amani ambayo walichezea na wanapata shida hadi leo kwani ni rahisi kuivunja amani ila ni gharama sana kuirejesha amani kama ilivyokuwa awali na nchi ya uchumi wa kati itafikiwa iwapo kila mtu atatimiza wajibu wake.

Kwa upande wao wawakilishi wa wanachuo waliishukuru serikali kwa kupunguza ada ya chuo kutoka shilingi laki sita hadi kufikia shilingi laki nne na nusu na kuiomba serikali kuwapatia ajira kwa wakati muafaka mara wanapomaliza chuo ili kuepuka kupoteza maarifa waliyoyapata chuoni na kuboresha mtaala wa elimu ya awali.

Ziara ya Profesa Ndalichako ameongozana na wakurugenzi mbalimbali wa Wizara ya Elimu ambapo alipata fursa ya kusikiliza taarifa ya Chuo, kukagua ukarabati wa chuo unaofanyika ikiwa ni moja ya vyuo 25 vilivyokarabatiwa na serikali ya awamu ya tano na kuongea na wanachuo 556 ambapo pia Mkuu wa Wilaya ya Kondoa Mhe. Sezaria Makota na wataalam mbalimbali walishiriki katika ziara hiyo.