RAS Dodoma awataka watumishi Kondoa Mji kufanya kazi kwa umahiri

Tarehe iliyowekwa: March 26th, 2024

Katibu Tawala Mkoa wa Dodoma Ndg. Kaspar Mmuya amewataka watumishi wa Halmashauri ya Mji Kondoa kufanya kazi kwa umahiri kwenye utendaji wao wa kazi kwa kuwa wote wamesoma wana sifa ndio maana wameajiriwa.

Kauli hiyo ameitoa wakati wa kikao na Wakuu wa Divisheni, vitengo, Watendaji wa Kata na Mitaa na watumishi wa makao makuu kilichofanyika katika ukumbi wa mikutano wa Halmashauri ya Mji hivi karibuni.

“Umahiri siku zote unajengwa kwa kufanya, umahiri unajengwa siku zote kwa kuelewa jambo na kuboresha katika utendaji wako unapofanya vile ndio unajenga umahiri wako na hutofautiana mtu na mtu na ndio maana watu wanasema huyu anafanya vizuri sababu ujuzi wake anafanya kwa vitendo hatimaye anakuwa mahiri kwenye hilo eneo,”amesema RAS Mmuya

Amesema mtumishi asiyetaka kujishughulisha atakuwa afisa jina na hatakuwa anajua lolote kwa kuwa anamtegemea mtu na kusingizia kila kitu anajua Mkurugenzi kwa kuwa yeye si msemaji wa taasisi hivyo aulizwe Mkurugenzi hivyo yeye kama Katibu Tawala atanyooka na mtumishi huyo kwa kuwa ana ruhusa ya kumpigia mtumishi yoyote na kuomba taarifa yoyote na mtumishi anapaswa kutoa taarifa ya ukweli juu ya eneo analolisimamia.

“Usishtuke kwanini Katibu Tawala amenipigia simu hapana nakupigia kwasababu wewe ni mtumishi mwenzangu mwenye dhamana ya kufanya jambo fulani nakupigia kwa kuwa nahitaji taarifa ya haraka ili unitumie niitumie kukuwakilisha kutoa taarifa ya ubora ulioufanya katika eneo lako, sasa ukiniambia sijui mi nitakushangaa ila sintasema sijui na nitakutetea sababu moja ya jukumu langu ni kukutetea na kukulinda wewe sababu nilipokuja nilikabidhiwa watumishi,”amesema RAS Mmuya

Aidha amewataka Wakuu wa divisheni na vitengo kuhakikisha wanajulikana na kuitangaza Halmashauri kwa kukusanya mapato kupitia kodi mbalimbali na kuwa na vyanzo vya uhakika vya mapato kwa kuhakikisha wanamshauri Mkurugenzi kutumia fursa zilizopo katika maeneo yao kukusanya mapato mengi.

Ameongeza kwa kuwataka kusimamia fedha za miradi zinazoletwa katika Halmashauri kwa kuhakikisha inakamilika kwa wakati na ubora unaotakiwa ikiwa ni pamoja na kuweka mipango na kutenga fedha za kununua madawati na kuhakikisha hakuna mwanafunzi anayekaa chini na kuweka mipango pamoja na wazazi ya kumaliza utoro wanafunzi kuanzia elimu msingi hadi sekondari.

“Kukaa pamoja kuna faida zake ukiwa unakaa kwenye kazi usiwe na misimamo mnoo fanya kazi zako lakini kenye mahusiano kutakusaidia kazi zako zitekelezwe vizuri, ukitaka kufanikiwa fanya kazi kwa asilimia 20 na chukua asilimia 80 kwenye mahusiano sababu katika maisha tunategemeana na siwezi kufahamu mapungufu yangu na madhaifu yangu kama siwezi  kuinteract na mtu,”amesisitiza RAS Mmuya

Akiongea kwa upande wake Mkurugenzi wa Halmashauri ya Mji Ndg. Said Majaliwa amemshukuru Katibu Tawala kwa kufika katika Halmashauri ya Mji Kondoa na kuwa Halmashauri ya pili kuitembelea toka kuteuliwa kwake na kumuahidi kuyafanyia kazi yote ambayo ameyatolea maelekezo kwa ajili ya kuboresha utendaji kazi.

Katika ziara yake Katibu Tawala ameongoaza na wataalam mbalimbali kutoka ofisi yake ambapo pia amefanya ukaguzi wa miradi ya nyumba ya Mkurugenzi ulio katika hatua za ukamilishaji wenye thamani ya shilingi milioni 150 na Hospitali ya Mji Kondoa ambao umekamilika na una thamani ya shilingi milioni 900.