RC Dodoma ataka miradi kukamilika kwa wakati na ubora

Tarehe iliyowekwa: November 13th, 2024

Mkuu wa Mkoa wa Dodoma Mhe. Rosemary Senyamule amewataka mafundi kumaliza ujenzi wa miundombinu ya madarasa kwa wakati na kujenga kwa ubora ili waweze kulipwa malipo yao kwa wakati kwa kuwa fedha za ujenzi wa miradi hiyo zimekwishatolewa.

Ameyasema hayo alipofanya ziara katika eneo la ujenzi wa Shule ya Amali mradi uliopo katika kata ya Kingale na ujenzi wa madarasa 4 na matundu 8 ya vyoo katika Shule ya Sekondari Dilai hivi karibuni.

Akiongea katika mradi huo Mhe. Mkuu wa Mkoa amesema miradi ikikamilika kwa wakati itasaidia kufikia malengo ya Serikali ya kuanza kuwapokea wanafunzi na ubora utasaidia majengo hayo kuwepo kwa muda mrefu na kuwasaidia wanafunzi wengi kujifunza na kupata ujuzi.

“Ujenzi wa shule ya Amali umekwishatengeneza ajira mbalimbali kwa wananchi wa Kingale ikiwemo mafundi wanaojenga lakini pia kwa wanawake ambao wamejitokeza kuuza chakula kwa mafunzi hao hali inayoongeza mzunguko wa fedha katika kata hiyo na Wilaya kwa ujumla”amesema Mhe. Rosemary.

Aidha ameongeza kuwa baada ya kukamilika kwa mradi huo wananchi watapata ujuzi wa vitendo kwa fani mbalimbali ambazo zitakuwa zikitolewa shuleni hapo ikiwemo ufundi cherehani, ufundi uwashi na ufundi wa kuchomelea.

Aidha amewasisitiza vijana na wananchi wote kujitokeza kupiga kura katika uchaguzi wa Serikali za Mitaa utakaofanyika novemba 27 mwaka huu ili waweze kuchagua viongozi watakaowasaidia kuwaletea maendeleo katika mitaa yao.

Hata hivyo ameongea na wanufaika wa mkopo utokanao na asilimia 10 ya mapato ya ndani ya Halmashauri ya Mji Kondoa iliyotolewa hivi karibuni ambapo amewaasa kurejesha kwa wakati ili wengine wanufaike na walionunulia pikipiki kuzingatia usalama barabarani na kuepuka kunywa pombe.

Mradi wa Ujenzi wa shule ya amali unagharimu kiasi cha shilingi milioni 544 na unatarajiwa kukamilika mwishoni mwa mwezi wa 12 mwaka huu ili uanze kufanya kazi mwezi Januari mwaka 2025.