RC Mahenge azitaka Halmashauri kutatua kero za walemavu kufikia Machi 2020

Tarehe iliyowekwa: December 3rd, 2019

Mkuu wa mkoa wa Dodoma Dkt. Binilith Mahenge amezitaka Halmashauri za Mkoa huo kuunda kamati, kufanya sensa kwa watu wenye ulemavu na kuwasilisha taarifa hiyo ofisini kwake ifikapo Machi 30,2020.

Kauli hiyo ilitolewa na Mkuu wa Wilaya ya Kondoa Mhe. Sezaria Makota alipokuwa akisoma hotuba kwa niaba ya Mkuu wa Mkoa katika maadhimisho ya watu wenye ulemavu kimkoa yaliyofanyika katika uwanja wa Sabasaba Kondoa Mjini.

“Mkoa wa Dodoma baadhi ya Halmashauri zimeunda kamati za watu wenye ulemavu ambapo kwa mitaa ni asilimia 52 na vijiji asilimia 58 hivyo ni jukumu letu kuhakikisha tunaongeza kasi na kufikia asilimia 100,”alisema Dkt. Mahenge.

Aidha alizitaka halmashauri hizo kutenga asilimia 3 za ajira kwa ajili ya watu wenye ulemavu kwani nao wanaweza kufanyakazi kama watu wasio na ulemavu.

“Asilimia 2 ya mikopo imeendelea kutolewa kwa watu wenye ulemavu hivyo ni wakati wao kuchangamkia fursa hiyo ili waondokane na dhana ya kuwa ombaomba na kujiinua kiuchumi,”alisisitiza Dkt. Mahenge.

Hata hivyo aliipongeza Halmashauri ya Mji Kondoa kwa kutoa mikopo kwa vikundi viwili kwa watu wenye ulemavu na kukipongeza chama cha SHIVYAWATA kwa kuunganisha vyama vya watu wenye ulemavu na kuwaweka pamoja.

“Kauli mbiu ya mwaka huu inaendana na hali halisi ya sasa ambapo inahamasisha watu wenye ulemavu kushiriki katika masuala ya uongozi na tumeona Mheshimiwa Rais alivyowateua katika nyadhifa mbalimbali wakimemo Mhe. Stela Ikupa, Balozi Abdala Possi na Naibu Katibu Mkuu Amon Mpanju,”alisema Dkt. Mahenge.

Awali akisoma risala kwa niaba ya watu wenye ulemavu Mkoa wa Dodoma Bwana Justus Ng’wantalima alisema kuwa wanakabiliwa na changamoto mbalimbali ikiwemo kukosekana kwa wakalimani wa alama katika taasis za serikali na kutofanyika kwa vikao vya kamati za watu wenye ulemavu katika maeneo yaliyounda kamati..

Maadhimisho ya watu wenye ulemavu duniani hufanyika kila Desemba 3 na kwa mwaka 2019 maadhimisho hayo yamefanyika Wilayani Kondoa ambapo ilihudhuriwa na wadau mbalimbali wa serikali na Mashirika binafsi na ilibeba kauli mbiu iliyosema “Kuhamasisha Ushiriki wa watu wenye Ulemavu na Uongozi, Tekeleza malengo ya Maendeleo endelevu ya