Serikali yatoa mafunzo ya kuwajengea uwezo walimu wa somo la kiingereza darasa la tatu

Tarehe iliyowekwa: January 23rd, 2025

Serikali kupitia Wizara ya Elimu, Sayansi na Teknolojia, OR - TAMISEMI kwa kushirikiana na Programu ya Shule Bora chini ya ufadhili wa UNICEF imeanza Mafunzo ya somo la Kiingereza kwa walimu wa darasa la tatu kuanzia tarehe 23 - 25/01/2025 katika Kituo cha Mafunzo ya Walimu  Iboni  kwa ajili ya kuendelea kujenga uwezo kwa walimu katika ufundishaji wa somo hilo kwa kutumia mtaala ulioboreshwa.

Mafunzo hayo yamefunguliwa na Mkurugenzi wa Halmashauri ya Mji Kondoa Ndg.Said Majaliwa katika Kituo hicho cha  Iboni.

Akifungua mafunzo hayo, Mkurugenzi amewataka washiriki kuzingatia yote watakayofundishwa ili lengo la serikali la kuwawezesha kupata maarifa na mbinu bora za kufundishia na kujifunzia  lipate  kutimia

"Ninachokiomba kutoka kwenu ni kuhakikisha haya mafunzo yanatoa matokeo chanya  mnapoenda kuwafundisha wanafunzi kwa kila shule" amesema Mkurugenzi Majaliwa.

Aidha,  ametoa msisitizo kwa kila mshiriki kuzingatia maadili ya utumishi wa Umma katika kipindi chote cha mafunzo ikiwa ni pamoja na kudumisha nidhamu na ushirikiano.

Aidha, Mkurugenzi wa Halmashauri, amemshukuru Mheshimiwa Rais wa Jamhuri ya Muungano wa Tanzania Dkt. Samia Suluhu Hassan kwa kuhakikisha walimu  wanapata mafunzo ya  mara kwa mara ambayo ni muhimu kwa ajili kuboresha ufundishaji ili kujenga umahiri stahiki kwa kila mwanafunzi.

Kwa upande wake Mwenyekiti wa mafunzo hayo ya  walimu,  amemshukuru Mkurugenzi wa Halmashauri kwa kufungua mafunzo na kuahidi kuwa washiriki  watajifunza kwa makini na kutumia ipasavyo ujuzi watakaupata kwa ajili ya kuboresha ufundishaji na ujifunzaji unaozingatia Elimu Jumuishi.

Mafunzo hayo yameandaliwa kwa lengo la kuwajengea uwezo walimu wa somo la "English" darasa la tatu kuhusiana na mtaala ulioboreshwa ambapo wawezeshaji ni watatu wakiwemo walimu mahiri wawili waliopata mafunzo ya kuwa wawezeshaji ngazi ya Halmashauri  na Mkufunzi mmoja kutoa Chuo cha Ualimu Bustani.