Serya washukuru kwa bilioni 2 za miradi ya maendeleo kwa miaka minne

Tarehe iliyowekwa: August 31st, 2024

Wananchi wa Kata ya Serya wameishukuru Serikali na Halmashauri ya Mji Kondoa kwa kuwapatia zaidi ya shilingi bilioni kwa ajili ya utekelezaji wa shughuli za maendeleo katika sekta za afya, elimu, maji, umeme, barabara na kilimo na mifugo katika kipindi cha miaka minne.

Hayo yamesemwa na Mheshimiwa diwani wa kaya ya Serya Mhe. Kulwa Pazi alipokuwa akiongea katika mkutano wa wananchi ambao ulioongozwa na Mwenyekiti wa Halmashauri ya Mji Kondoa Mhe. Mohamed Kiberenge ikiwa ni sehemu ya ziara yake ya kupita kata kwa kata kwa ajili ya kusoma mafanikio ya serikali katika kata zote 8 za Halmashauri ya Mji.

“Kwa kweli serikali imetufanyia mengi makubwa wananchi wa Serya tulikuwa na changamoto za afya imetujengea kituo kikubwa japokuwa kuna changamoto ya kukosekana kwa umeme, pia kwenye elimu tumepokea fedha nyingi kutoka serikalini, Halmashauri na mfuko wa jimbo tunashukuru sana,”amesema Mhe. Pazi

Pamoja na mafanikio hayo yote  ameiomba serikali iwasaidie changamoto ya daraja katika Mto Bubu kwani bado ni changamoto kubwa kwananchi wa Serya msimu wa masika ikiwa ni pamoja na kumaliza changamoto ya mgogoro wa mipaka ya Swagaswaga na wananchi ili waendelee na shughuli zao za kujitafutia kipato.

Akisoma fedha zilizoletwa na Serikali kuu Mtendaji wa Kata ya Serya Ndg. Hamis Juma Amesema katika kipindi cha miaka minne serikali imeleta fedha kwa ajili ya kuboresha miundombinu katika sekta ya Elimu Msingi milioni 452.5, Elimu Sekondari shilingi milioni 209.5, Elimu Bila Malipo milioni 63.4, Afya ujenzi wa kituo cha Afya Serya milioni 590 na barabara milioni 633.5 ikiwa ni pamoja na kuleta umeme katika mitaa 2.

“Mhe. Mwenyekiti kupitia mapato ya ndani ya Halmshauri ya Mji tumepokea shilingi milioni 56.4 za ujenzi wa zahanati ya Chandimo ambalo lipo hatua ya umaliziaji, mfuko wa jimbo umetuletea shilingi  milioni 11 kwa ajili ya shule shikizi ya Tekule na Serya ambapo wananchi katika miradi yote hii wamechangia shilingi milioni 6,”amsema Mtendaji Hamis

Akiongea katika mkutano huo Mwenyekiti wa Halmshauri ya Mji Kondoa Mhe. Mohamed Kiberenge amewataka wananchi wa kata hiyo kuendelea kuwa na imani na serikali kwani inafanyia kazi changamoto zote za wananchi zilizowasilishwa hivyo ni waoa kuwa na subira.

“Niwapongeze Serya mmepiga hatua kwenye suala la maji kwani katika mitaa yote maji yapo ila nawasihi muitunze tu miundombinu ya maji ili itumike kwa muda mrefu. Aidha kwa upande wa Mto Bubu muendelee kuwa na subira kwani serikali imekwishafanya upembuzi yakinifu wa ujenzi wa daraja hilo muhimu na kiunganishi cha mikoa ya Singida na Kondoa na linahitaji fedha nyingi,”amesema Mhe. Kiberenge

Aidha amewataka wananchi hao kuendelea kuwa na umoja kwani taifa llote ili liendelee linatakiwa kuimarisha umoja na amani kinyume na hapo itatumia muda mwingi kutatua migogoro badala ya kuleta maendeleo kwa wananchi.

“Nawaomba sana wananchi mchangie maendeleo ya Kondoa kwa kutoa ushuru kupitia tozo mbalimbali za kisheria kwa bila kufanya hivyo hatuwezi kuleta maendeleo kwani fedha zinazokusanywa ndizo zinarudi kwaajili ya kujenga vituo vya afya mfano zahanati ya Chandimo inajengwa kwa fedha za mapato ya ndani na hapa tu na maeneo mengine ya Halmashauri,”amesisitiza Mhe. Kiberenge.

Mwenyekiti wa Halmashauri ya Mji Kondoa anafanya ziara katika kata 8 za Halmashauri kwa ajili ya kusikiliza kero ya zananchi na kusoma fedha za maendeleo zilizopelekwa kwa wananchi wa kata hizo kwa kipindi cha miaka 4 ambapo Serya ni kata ya pili baada ya Kingale na anaongozana na Wakuu wa Idara na Vitengo na watalaam kutoka taasis zingine za Serikali.