"Shirikianeni watoro warudi shuleni"- Mkurugenzi Sweya

Tarehe iliyowekwa: March 9th, 2023

Maafisa Elimu Kata, Watendaji wa Kata na Mitaa na Wakuu wa Shule  katika Halmashauri a Mji Kondoa wametakiwa kufanya kazi kwa kushirikiana ili kuwapata wanafunzi ambao hawajaripoti shuleni kwa ajili ya kuanza masomo.

 Hayo yamesemwa  na Mkurugenzi wa Halmashauri ya Mji Kondoa Ndg. Paul Sweya wakati wa kikao cha pamoja na wataalam hao kilichofanyika katika ukumbi wa mikutano wa Halmashauri ya Mji Kondoa hivi karibuni.

 “Mnatakiwa kufanya ufuatiliaji wa wanafunzi watoro sugu katika shule za sekondari kwa kuwa  wasipofuatiliwa sasa wanaweza kuja kujiingiza kwenye vitendo vya kihalifu na kusababisha uvunjifu wa amani.”amesema Mkurugenzi Sweya 

Aidha mewataka viongozi hao kufanya ufuatiliaji huo nyumba kwa nyumba na kuhakikisha wanapatikana na kwa wale ambao hawatapatikana wazazi wao wafikishwe kwenye vyombo vya kisheria hadi watoto wao wapatikane.

Aliendelea kuwakmbusha kusimamia ujenzi na utunzaji wa miundombinu iliyojengwa kwa fedha za Serikali ikiwa ni pamoja na utunzaji wa nyaraka zote za msingi za miradi husika.

 Akiongelea suala la utunzaji wa mazingira Mkurugenzi amewataka viongozi hao kuhakikisha wanapanda miti ya vivuli na matunda pamoja na kulima  mazao ya chakula katika maeneo ya shule na kuwasilisha taarifa ya utekelezaji wa jambo hilo kwenye vikao vya robo mwaka vya Halmashauri.

Mkurugenzi aliendelea kuwaeleza Watendaji wa Kata na Mitaa kuandaa mikutano ya wadau wa elimu katika kata zao na kuwasilisha katika Ofisi ya Mkurugenzi ratiba za mikutano hiyo ili kuona jinsi menejimenti itaweza kushiriki katika vikao hivyo.

Kikao cha viongozi ngazi ya kata na Mitaa kimefanyika kwa ajili ya kukumbusha masuala mbalimbali ikiwemo utoaji wa chakula shuleni, namna ya kukabiliana na utoto wa wanafunzi na jinsi ya kudhibiti matendo ya ulawiti, ushoga na usagaji katika shule za Msingi na Sekondari.