Shule na Walimu waliofanya vizuri 2024 Kondoa Mji wazawadiwa

Tarehe iliyowekwa: February 20th, 2025

Walimu wa Shule za Msingi na Sekondari Halmashauri ya Mji Kondoa waliofaulisha wanafunzi kwa alama za juu katika mitihani ya kitaifa wamepewa zawadi ya fedha taslimu ikiwa ni sehemu ya motisha kwao na walimu wengine kufundisha kwa bidii ili kuongeza ufaulu kwa wanafunzi, shule na Halmashauri.

Hafla ya kuwa kuwakabidhi zawadi imeongozwa na Mwakilishi wa Mkuu wa Wilaya ya Kondoa Ndg. Ally Mbena na imefanyika katika ukumbi wa Chuo Cha Ualimu hivi karibuni.

Akiongea baada ya kukabidhi zawadi hizo Ndg. Ally Mbena amesema Mkuu wa Wilaya anawapongeza walimu wote waliofanya vizuri na kusema kuwa iwapo wote kwa Pamoja wataenda kutekeleza kwa  mikakati iliyowekwa na mkoa halmashauri inaweza kutoka ilipo na Kwenda mbali zaidi.

“Mkuu wa Wilaya amesema niwaambie kuwa ana ndoto kubwa na Kondoa anataka kama tunavyofanya kwenye mambo mengine na elimu tufanye vizuri zaidi na hataki kuona tunakuwa wanyonge tena kwenye sekta ya elimu”amesema Mbena.

Aidha ameongeza kuwa walimu wanapaswa kutimiza wajibu kwa kuwa haki inaenda na kutimiza wajibu lakini wengi ni wepesi wa kudai haki na wazito kutimiza wajibu hivyo kila mmoja kwa nafasi yake katika ngazi zote kuanzia Halmashauri hadi Mwalimu wa darasani atimize wajibu ili kuona matokeo chanya.

Ameongeza kuwa mwaka 2025 ni wa maelekezo hivyo wanapaswa kutekeleza maazimio ya kikao cha wadau wa elimu mkoa kilichoshauri mambo mbalimbali na kikao cha wadau wa elimu wilaya ambacho kilikubaliana kutengeneza timu ya ufuatiliaji ili kupita katika shule zote na kuona changamoto za mtu mmoja mmoja zitatuliwe kwa wakati.

“Timu hii itasaidia sababu itakapofika katika eneo iangalie kwasababu matatizo yanatofautiana kulingana nae neo nae neo changamoto iliyopo Bolisa haifanani na iliyopo Hachwi unaweza ukafikiri suala la kutoa chakula ndio muarobaini kuna wanaotoa chakula na wanafanya vibaya sababu matatizo yanatofautiana,”amesema Mbena

Akiongea kwa upande wake Mwenyekiti wa Halmashauri ya Mji Kondoa Mhe. Mohamed Kiberenge suala la kutoa motisha ni jambo ambalo halmashauri imejiwekea na itaendelea nalo sababu ni agizo la mkoa na wao kama Waheshimiwa Madiwani wataenda kuangalia namna bora zaidi ya kuboresha elimu kwa kuwamotisha na wengine.

“Pia niwashukuru Wakuu wa Shule, Walimu Wakuu na Walimu wengine wote kwa kazi kubwa mnayofanya wamezungumza viongozi wenzangu wakati tunaingia madarakani tulikuta shule ina wanafunzi 95 wamepata ufaulu wa 0 lakini sasa wamebakia 6 tusifikiri ni kazi rahisi hii imetokana na umoja wetu kazi ya sisi viongozi na walimu”amesema Mhe. Kiberenge.

Kwa upande wao wawakilishi wa wabunge wamesema kuwa Ofisi zao zitaendelea kuwawezesha walimu kwa kuhakikisha wanazidi kuwamotisha wote waliofanya vizuri kwa kuwanunulia mashine za kudurufu karatasi na kuwapatia fedha taslimu waliofaulisha kwa alama za Daraja A na kuwatia moyo ambao hawajapata zawadi kuwa wana nafasi ya kufanya vizuri nao mwakani na kupata zawadi.

Zaidi ya walimu 50 kutoka Shule za Serikali na binafsi za Msingi na Sekondari wamepatiwa zawadi kwa kufaulisha vizuri katika mitihani ya taifa ya darasa la nne, saba, kidato cha pili na nne pamoja na shule zilizoongeza ufaulu kwa mwaka 2024.