"Simamieni miradi ikamilike kwa wakati" - DC Nyangasa

Tarehe iliyowekwa: August 3rd, 2024

Mkuu wa Wilaya ya Kondoa Mhe. Fatma Nyangasa amewataka Wakuu wa Idara wa Halmashauri ya Mji Kondoa kusimamia miradi iliyochini ya idara zao ili ikamilike kwa wakati uliopangwa na ubora.

Ameyasema hayo wakati wa ziara ya ukaguzi wa miradi aliyoifanya ili kujionea utekelezaji wake ambapo aliongozana na Mwenyekiti wa Halmashauri ya Mji Kondoa, Mkurugenzi wa Halmashauri na wakuu wa Idara.

Akiongea katika mradi wa ujenzi wa madarasa, ukarabati wa maabara na ujenzi wa vyoo Shule ya Sekondari Serya Mhe. Fatma amewataka Idara ya Elimu kumsimamia kwa karibu fundi anayetekeleza mradi huo kwa kuhakikisha kuwa anakamilisha ndani ya mwezi huu.

"Fundi ongeza mafundi wa kutosha hapa tupo nje ya muda sintakuelewa kabisa ikifika tarehe 15 utukabidhi mradi huu mimi nitakuja tarehe 10 kuangalia ulipofikia sasa nisikute hizi hadithi za sasa"amesisitiza Mhe. Fatma

Hata hivyo amewataka Wahandisi kufika mara kwa mara katika miradi na kutoa maelekezo stahiki kwa mafundi ili wajenge miradi katika viwango vinavyotakiwa ikiwa ni pamoja na kusaini katika vitabu vya eneo la miradi.

Naye Mkurugenzi wa Halmashauri ya Mji Kondoa Ndg. Said Majaliwa amemshukuru Mheshimiwa Mkuu wa Wilaya kwa kupitia miradi na kuahidi kuyafanyia kazi maelekezo yote aliyoyatoa kwani amekuwa akipita na kuongea na mafundi hao mara kwa mara.

"Mheshimiwa Mkuu wa Wilaya mimi huwa nakuja kwenye miradi hii na kutoa maelekezo hata paha Serya niliongea na fundi akanieleza changamoto yake nikaifanyia kazi na nikamwambia aongeze mafundi lakini hajafanya hivyo ila nakuahidi tutasimamia na itakamilika kwa wakati"amesema Mkurugenzi Majaliwa

Mkuu wa Wilaya amefanya ziara ya ukaguzi wa miradi ya Stendi ya Bicha, eneo la maegesho ya malori, Zahanati ya Mulua, ujenzi Serya Sekondari na Kituo cha Afya Serya ambapo aliambatana na Katibu Tawala Wilaya Ndg. Christina Kalekezi.