Taa za Barabarani Kubadilisha Muonekano wa Kondoa Mjini

Tarehe iliyowekwa: June 18th, 2018

Mji wa Kondoa unatarajiwa kubadilika kimuonekano baada ya kukamilika kwa uwekaji lami, ujenzi wa makalvati, ujenzi wa mifereji na uwekaji wa taa za barabarani katika barabara za mitaa ya Kondoa Mjini.

Ufafanuzi huo ulitolewa na Kaimu Meneja wa TARURA Kondoa Mji Mhandisi Wera Kweka alipokuwa akitoa taarifa ya utekelezaji wa kazi za TARURA mbele ya wajumbe wa baraza la Halmashauri ya Mji katika ukumbi wa Kondoa Irangi hivi karibuni.

“Fedha zilizotengwa katika bajeti ya mwaka 2016/2017 zimefanya maboresho katika barabara za mjini kwa kuziwekea lami ambapo kazi inayoendelea ni ukamilishaji wa ujenzi wa mifereji, makalvati na mwisho itakuwa ni uwekaji wa taa za barabarani na jumla ya barabara zilizowekewa lami ni Kilomita 1.2.”Alisema Kweka

Aidha aliongeza kuwa kwa fedha za bajeti ya mwaka 2017/2018 wamejipanga kutengeneza barabara za Mjini yenye jumla ya urefu wa Kilomita 1.26 ambazo zitagharimu kiasi cha zaidi ya milioni miasita na wameshapata mkandarasi na anaendelea na kazi.

Alizitaja barabara hizo kuwa ni Njiapanda-Madiba Kilomita 0.29, Njiapanda-Madiba- Sabasaba Yard Kilomita 0.125, CCM- Tumbero Road Kilomita 0.33, CCM- Iboni Shule ya Msingi Kilomita 0.25 na Tumbero- Soweto kwa Babu Shop Kilomita 0.29.

Aliendelea kutaja barabara zilizofanyiwa matengenezo kwa bajeti ya mwaka 2017/2018 kuwa ni barabara za KKKT, Makaburini, Mashine ya Alizeti na barabara ya Iboni pia fedha hizo zimetumika kuchimba mifereji umbali wa mita 500 na kutengeneza makalvati yenye sentimita 900.

Hatahivyo Mhandisi Wera Kweka alizitaja kazi zinazoendelea kwa kipindi hiki kuwa ni matengenezo ya barabara ya Serya- Mongoroma Mtalyangu yenye urefu wa Kilomita 8 kwa kuijengea makalvati ya “line 3” na kuweka changarawe umbali wa Kilomita 3.

“Pia katika mradi huu zitajengwa kalvati za boksi na kujenga ukuta wa mawe kwa ajili ya kuzuia maji na kazi imeshaanza na jumla ya shilingi milioni mia moja na ishirini zitatumia hadi kukamilika kwa mradi huu.”Alisema Kweka

Maboresho ya barabara zote hizo unafanywa na Wakala wa Barabara Mijini na Vijijini Kondoa Mji tangu kuanzishwa kwake mapema mwaka jana.