"Taarifa utazotoa kwa karani ni siri" - Dkt. Mkanachi

Tarehe iliyowekwa: July 30th, 2022

Mkuu wa Wilaya ya Kondoa Dkt. Khamisi Mkanachi amewahakikishia wananchi wa Kondoa kuwa taarifa watakazotoa ni siri kati yao na makarani wa sensa na zitatumika kwa ajili ya kupata takwimu zitakazopelekea serikali kupanga mipango yake na si vinginevyo.

Kauli hiyo ameitoa wakati wa tamasha la kuhamasisha sensa ya watu na makazi lililofanyika katika uwanja Sabasaba Kondoa Mjini.

"Mkae mkifahamu kuwa taarifa hizi hazitumiki kwa namna yoyote zaidi ya kitakwimu tu kupanga mipango ya kiserikali sawasawa usije ukahofisha sasa ukaanza kudanganya ukajiwekea mambo makubwamakubwa kumbe hayapo au ukafichaficha kumbe vipo utatukwaza kama serikali maana tutashindwa kupanga mipango yetu ya maendeleo kwa watu wetu,"amesema Dkt. Mkanachi

Aidha amewataka washiriki wa bonanza hilo kwenda kutoa ujumbe sahihi juu ya sensa kwa kuelezea maswali yatakayoulizwa siku ya sensa na kuongeza kuwa watakaopita kuchukua taarifa ni makarani wa sensa waliopewa mafunzo ambapo zaidi ya wataalam laki mbili wamepewa mafunzo na kwa Wilaya ya Kondoa ni wataalam zaidi ya elfu moja watashiriki kwa fedha za serikali hivyo jambo hilo ni muhimu kwa kuwa serikali imetenga fedha nyingi kwa ajili ya utekelezaji.

"Makarani watakaokuja watakuwa wamevaa sare maalum hawatavaa kama  mimi hapa track suit  na watakuwa na vitambulisho hatakuja mtu kutoka sehemu yoyote na hatakuwa peke yake atakuwa na Mwenyekiti wako wa mtaa au kijiji na watakuwa wamechukua tahadhali zote ya kujikinga na UVIKO 19 kwa hiyo hakuna atakayeambukizwa na atakayemwambukiza karani wetu zoezi litakwenda vizuri na litakamilika,"amesisitiza Dkt. Mkanachi

Naye mbunge wa Kondoa Mjini Mhe. Ally Makoa amesema wananchi wengi wanaelimu ya sensa jambo lililobakia ni kuendelea kutoa elimu kwenye vikao na mikutano ili waendelee kupata elimu na kuongeza kuwa upatikaji wa takwimu hizo utasaidia kupata miradi ya maendeleo ikiwemo mradi wa uendelezaji wa miji TACTIC ambao idadi ya watu ni kigezo muhimu kwa ajili ya kupata miradi hiyo.

Bonanza hilo limefanyika ikiwa ni mwendelezo wa zoezi la kutoa elimu ya sensa ambapo Mkuu wa Wilaya aligawa vipeperushi kwa makundi mbalimbali na kushiriki katika zoezi la ukimbiaji katika maeneo ya mjini na mpira wa mguu  kati ya timu ya Wasafi na Sensa Spesho ambapo timu zote zilifungana goli 2 na lilihudhuriwa na watumishi wa taasisi za ssrikali na wananchi wa wilaya ya Kondoa.