Tengeni 10% ya mapato kabla ya Matumizi - Dkt. Mahenge

Tarehe iliyowekwa: July 18th, 2018

Mkuu wa Mkoa wa Dodoma Dkt. Binilith Mahenge ameitaka Halmashauri ya Mji Kondoa kutenga asilimia kumi ya kila mapato yake kabla ya matumizi kwa ajili ya kuwakopesha wanawake na vijana.

Aliyasema hayo wakati wa kikao cha baraza maalum la waheshimiwa madiwani kwa ajili ya kujadili hoja za Halmashauri ya Mji zilizojitokeza wakati wa ukaguzi uliofanywa na ofisi ya Mkaguzi na Mdhibiti wa fedha za Serikali kikao kilichofanyika katika ukumbi wa mikutano wa Kondoa Irangi.

“Mpende msipende lazima mtenge fedha hizo na kwasasa tengeni kabla ya matumizi kulingana na mlichokusanya na asilimia tisini itumieni katika shughuli zingine.’Alisema Dkt. Mahenge

Aidha aliwasihi waheshimiwa madiwani kusimamia na kuhakikisha fedha hizi zinapatikana na kuwafikia walengwa ambao  ni wanawake na vijana ili waweze kujiajiri na kujiongezea kipato  chao.

Hata hivyo alimtaka Mkurugenzi kutotoa fedha kwa vikundi ambavyo havitambuliki  na kukosa mpango mkakati endelevu wa mradi wao na kuona kama una faida sababu fedha hizo zitatakiwa kurejeshwa.

“Kuna tabia fedha zikitolewa Mkurugenzi anasema nimeshatimiza wajibu wangu na kukaa pembeni watu wakishapata fedha wanagawana na kupotea moja kwa moja, ukitoa fedha zile ni zako zifuatilie,zisimamie na kushirikiana na wataalam wengine wasaidieni vikundi hadi zitoe faida.”Alisisitiza Dkt. Mahenge

Hata hivyo  aliwapongeza Halmashauri ya Mji Kondoa kwa kupata hati safi katika ukaguzi huo na kuwataka watendaji kuendelea kutimiza majukumu yao ya kila siku ili kupunguza hoja ambazo nyingi siyo nzito na uwezo wa kufanya hivyo sababu halmashauri hiyo ina viongozi na watendaji wachapakazi.

Baraza maalum la kupitia hoja za ukaguzi wa hesabu  kwa  mwaka  2016/2017 lilifanyika hivi karibuni na kuhudhuriwa na Mkuu wa Mkoa, Waheshimiwa madiwani na watendaji wa Halmashauri ya Mji Kondoa.