TFS, Hifadhi ya Michoro Kolo wakabidhi madawati na saruji

Tarehe iliyowekwa: September 22nd, 2021

Wakala wa Misitu na Hifadhi ya Michoro ya Miambani  Kolo Kondoa wamekabidhi madawati 28 pamoja na mifuko ya saruji 40 kwa ajili ya kuboresha mradi wa ujenzi wa maabara katika Shule ya Sekondari Kolo.

Makabidhiano hayo yamefanywa na Meneja wa Kituo cha michoro ya mapangoni Kolo Zuberi Mabie wakati wa mkutano wa Wananchi wa Mtaa wa Kolo B  yakiongozwa na Kaimu Mkurugenzi  Halmashauri ya Mji Hassan Kiseto hivi karibuni.

“Tumefanya hivi  kwaajili ya kufanikisha mradi wa ujenzi wa maabara katika shule yetu ya Sekondari Kolo ili  kuwawezesha  wanafunzi kupata elimu bora kwa kuwa elimu ndio kila kitu na kuhakikisha tunadumisha  mahusiano mazuri kwa jamii inayotuzunguka,"amesema Meneja Zuberi

Kwa upande wake Kaimu Mkurungenzi Halmashauri ya Mji Kondoa Hassan Kiseto  amewashukuru wadau hao kwa mchango na jitihada walizozionyesha ili kuboresha elimu ya watoto na kukuza mahusiano mazuri  kwa jamii inayowazunguka.

“Hii ni ishara kwamba tunaheshimu mradi huu pamoja na hifadhi lakini pia ni sehemu ya ujirani mwema ili kuboresha  mahusiano yetu na  yaweze kuendelea vizuri, zaidi tunawaombea kwa Mungu  ili  roho yenu njema iweze kuendelea zaidi na zaidi,” amesisitiza Kaimu Mkurugenzi Kiseto.

Ameongeza kuwa wananchi hao wanapaswa kuona wao ni sehemu ya hifadhi hiyo hivyo wanapaswa kuheshimu sheria na taratibu zilizowekwa na iwapo kuna tofauti zilitokea awali kati yao kwa kuingia hifadhini waache mara moja kwa kuwa wote ni majirani.

Makabidhiano hayo yamefanyika  ikiwa ni sehemu ya jitihada za kukamilisha mradi wa ujenzi wa shule ya Sekondari Kolo ambapo wamekabidhi meza 28 na viti 28 pamoja na mifuko ya saruji 40 na kuhudhuriwa na Kaimu Mkurugenzi Mji  Kondoa Hassan Kiseto ,Afisa Elimu Sekondari, Afisa Mtendaji wa Kata  ya Kolo,Mkuu wa Shule ya Sekondari Kolo,viongozi wa Hifadhi ya Michoro Miambani na wananchi wa Mtaa wa Kolo B.