Timu ya ukaguzi wa miradi mkoa yaridhishwa na miradi ya Kondoa Mji

Tarehe iliyowekwa: May 14th, 2024

Timu ya ukaguzi wa miradi kutoka Ofisi ya Mkuu wa Mkoa wa Dodoma wameridhishwa na hatua za utekelezaji wa miradi mbalimbali inayotekelezwa katika Halmashauri ya Mji Kondoa ikiwa ni pamoja na kutoa ushauri wa namna bora ya utekelezaji wa miradi.

Hayo yamesemwa na kiongozi wa msafara huo Mhandisi Happinness Mgalula wakati wa kuhitimisha ziara ya ukaguzi wa miradi ndani ya Halmashauri ya Mji Kondoa iliyofanyika hivi karibuni.

“Ofisi ya Mkuu wa mkoa ina utaratibu wa kufanya ufuatiliaji na kufanya tathmini ya miradi yote ya maendeleo inayotekelezwa katika halmashauri zake zipo timu mbalimbali katika halmashauri mbalimbali kwa ajili ya kwenda kufanya ukaguzi na sisi tulipangiwa Kondoa Mji na tumefanya ukaguzi wa miradi kumi ya elimu, afya na utawala,”amesema Mhandisi Mgalula

Aidha amesema baada ya kupita katika miradi hiyo wanampongeza Mkurugenzi na timu ya Menejimenti kwa usimamizi mzuri wa miradi ambayo mingi inaendelea vizuri ambapo pia ameishauri menejimenti kuhakikisha miradi ambayo haijakamilika inakamilika kwa wakati na kutoa huduma iliyokusudiwa kwa wananchi.

“Jukumu pia la huu ufuatiliaji na tathmini hii ni kuangalia miradi inavyoendelea na kuwatia changamoto wenzetu wanaotekeleza huku ili kuhakikisha miradi inakamilika kwa wakati na iendane na thamani ya fedha iliyotolewa na iweze kutumiwa na jamii na taasisi kwa wakati,”amesema Mhandisi Mgalula

Ameongeza kwa kushauri kuwa miradi ya ujenzi wa ofisi za mitaa Halmashauri ijitahidi kutenga fedha kwenye eneo moja ambapo mradi utakamilika badala ya kuweka fedha kidogo kwenye miradi mingi ambayo inakuwa haikamiliki jambo ambalo watendaji wamelichukua kwa ajili ya kulifanyia kazi.

Ameendelea kwa kueleza kuwa wamewashauri mafundi mbalimbali waliokutana nao katika miradi hiyo kuhakikisha wanazipenda kazi wanazozifanya ikiwa ni pamoja na kuwa wasafi kwa kuhakikisha wanajenga bila kuchafua rangi na sakafu bila kusafisha ili kazi ziwe katika ubora unaotakiwa.

“Kingine tunachokuja nacho ni kujifunza vitu mbalimbali ambapo kuna baadhi ya miradi tumewaomba wahandisi waandae BOQ za vifaa kwasababu tunataka kujifunza ni vifaa kiasi gani vinatakiwa kuandaliwa ili kumaliza mradi mfano wa bweni ili kama serikali tuweze kuboresha namna ya utekelezaji wa miradi hiyo,”amesisitiza Mhandisi Mgalula.

Amemshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kutoa fedha za utekelezaji wa miradi hiyo ambayo inakwenda kuigusa jamii moja kwa moja baada ya kukamilika kwake.

Kwa upande wake Kaimu Afisa Mipango wa Halmashauri ya Mji Kondoa Ndg. Zubeda Sumbe amewashukuru kamati nzima kwa kutembelea miradi hiyo na kuahidi kuyafanyia kazi yote waliyoagiza na kukamilisha miradi kwa wakati.

Jumla ya miradi kumi ya sekta kutoka sekta ya afya, elimu na utawala imetembelewa na timu ya wataalam kutoka ofisi ya Mkuu wa Mkoa kwa ajili ya kufanya ufuatiliaji na tathmini  ambapo pia waliongozana na wataalam kutoka Halmashauri ya Mji Kondoa.