"Tokeni ofisini mkatoe elimu ya masuala ya ardhi"- Mhe. Angelina Mabula

Tarehe iliyowekwa: September 21st, 2021

Watumishi wa Idara za Ardhi wametakiwa kutoka maofisini na kwenda kwa wananchi kutoa elimu mbalimbali za masuala ya ardhi badala ya kusubiria kwenda kutatua migogoro tu.

Hayo yamesemwa na Naibu Waziri wa Ardhi Mhe. Angelina Mabula wakati wa kikao kazi na watumishi wa Wilaya ya Kondoa kilichofanyika katika Ukumbi wa Halmashauri ya Mji Kondoa hivi karibuni.

“Kuna mambo mbalimbali yanayoendelea Wizarani nendeni mkatoe elimu hizo kwa wananchi ikiwemo suala la uhakiki wa umiliki wa taarifa za wamiliki wa ardhi ikiwa ni pamoja na kuwaelezea umuhimu wa wananchi kuwa na hati,”Amesema Mhe. Mabula

Aidha amesema uhakiki wa taarifa za wamiliki wa ardhi utasaidia mmiliki kutopoteza viwanja anavyomiliki kwani kwasasa watu wengi wamepotea viwanja vyao kwa kuandika majina ya watu wengine kwa kuhofia kuonekana na viwanja vingi wakati sheria inamruhusu kumiliki viwanja hata kumi.

“Uhakiki huu utasaidia mmiliki kutumia jina lake moja kwa viwanja vyote maeneo tofauti kwa faida ya vizazi vyake vijavyo na madodoso yatasambazwa nchi nzima ili kujaza taarifa na wakurugenzi nchi nzima nawaagiza kutenga madawati maalum kwa ajili ya kufanyia uhakiki,”amesisitiza Mhe. Mabula

Aliendelea kwa kuagiza maeneo yote ambayo bomba la mafuta litapita Wakurugenzi kutenga fedha kwaajili ya kufanya mpango wa matumizi ya ardhi kabla mradi haujaanza kwani kwa kutoyapanga maeneo hayo yatavamiwa na kuwa hovyo.

“Mgogoro wa King’ang’a inatakiwa pande zote mbili zikutanishwe wote na nyaraka zao na wapima waje kupima mipaka halisi ambayo itakubaliwa na pande zote ili kusiwe na mwingiliano tena kwa kuwa eneo hilo lina maslahi kwa pande zote mbili na lilitolewa kwa nia njema,”amesema  Mhe. Mabula

Akiongea awali Kamishna Msaidizi wa Ardhi mkoa wa Dodoma Thadeo Kabonge amesema Wizara kwasasa haipo tayari kupokea migogoro mipya inayoanzishwa na wataalam kizembe kama kuwapangia kiwanja kimoja watu wawili na kuchukua fedha za watu bila kuwapatia hati ambapo  migogoro itakayofanyiwa kazi ni  ile ya kiasili.

“Kuna viwanja vingi vilivyopimwa ila havina hati ongezeni makusanyo kwa kuwaandalia watu hati kwani bado tupo nyuma ambapo kwa mwaka 2020/2021 Halmashauri ya Mji Kondoa ilisajili hati 117 na Halmashauri ya Wilaya ya Kondoa ilisajili hati 89 na kwa mwaka wa fedha 2021/2022 Hamashauri ya Mji wameshasajili hati 30 tukazane kwa kuwa lengo la mkoa ni kusajili hati laki moja,”amesisitiza Kabonge

Naye Mbunge wa Kondoa Mjini  Mhe. Ally Makoa amemuahidi Mhe. Naibu Waziri kuwa atakuwa wa kwanza kuhamasisha wananchi kuchukua hati ili serikali ipate mapato na kuwaagiza wataalam wa Ardhi kuandaa mpango kabambe ikiwa ni sehemu ya maandalizi ya kuifanya Halmashauri ya Mji kuwa Manispaa.

Kikao kazi na Mhe. Naibu Waziri kimefanyika ikiwa ni mwendelezo wa vikao anavyofanya nchi nzima ambapo ameongeza mtumishi mmoja katika Idara ya Ardhi Halmashauri ya Mji Kondoa na kilihudhuriwa  na viongozi wa Ardhi mkoa, Kamati ya Ulinzi na Usalama, Waheshimiwa Madiwani, Wakuu wa Idara na Watendaji wa Kata.