"Tuige uvumilivu wa Mwalimu Nyerere" - Mkurugenzi Dakawa

Tarehe iliyowekwa: October 14th, 2020

Wananchi Halmashauri ya Mji Kondoa na watanzania kwa ujumla wameshauriwa kuiga uvimilivu aliokuwa nao Baba wa Taifa wakati huu ambao nchi ipo katika ujenzi wa miradi mikubwa inayoendelea. 

Ushauri huo umetolewa na Mkurugenzi wa Halmashauri ya Mji Kondoa Msoleni Dakawa alipokuwa akiongea  wakati wa kongamano la kumuenzi Baba wa Taifa Mwalimu Julius Kambarage Nyerere lililofanyika katika ukumbi wa Shule ya Wasichana Kondoa hivi karibuni.

“Baba wa Taifa alikuwa mvumilivu sana wakati wa kipindi chake cha uongozi alijitoa kwa kila hali pamoja na magumu yote aliyoyapitia kutoka kwa wakoloni lakini hakukata tamaa aliendelea kuitetea nchi ya Tanzania hadi ikapata uhuru,”amesema Mkurugenzi Dakawa

 Aidha ameongeza kuwa kutokana na uvumilivu aliokuwanao ulimpelekea Baba wa Taifa kuwa mzalendo namba moja kwa kuwa alikuwa pia muwajibikaji katika kazi yake ya ualimu kwa kutembea umbali mrefu hadi Pugu Sekondari kufundisha bila kuleta utegezi na visingizio mbalimbali.

 “Kila kiongozi kwa awamu yake amefanya mambo makubwa na ndio maana hata leo tunaona nchi ina maendeleo makubwa sababu Baba wa Taifa hakuwa mbinafsi na Mhe. Magufuli kwa kiasi kikubwa anaendeleza ndoto na maono ya Mwalimu Nyerere ambaye alitamani kuona wananchi wa Tanzania wanaondokana na umaskini na nchi inakua kiuchumi na tumeshuhudia katika awamu hii ya tano nchi imefikia uchumi wa kati,”amesisitiza Mkurugenzi Dakawa

Aliongeza kuwa Raisi kwasasa anatimiza ndoto zilizokuwa za Mwalimu Nyerere kwa kujenga miradi kama mradi mkubwa wa umeme katika mto Ruvu, ujenzi wa barabara, kuhamishia Dodoma makao makuu ya nchi, kutoa elimu bila malipo, kujenga hospitali na vituo vya afya kila wilaya lengo kuhakikisha wananchi wote wanapata huduma za afya bila kutembea umbali mrefu.

“Hata ambao wamejenga nyumba watakubaliana na mimi kuwa wakati wa ujenzi hali hubadilika ndani ya nyumba kwa kubana matumizi ambapo kama ulikuwa unakula nyama kila siku utakula mara moja kwa wiki lakini nyumba ikiisha unaamua hata kuchinja mbuzi ukiwa nyumbani kwako, hata sasa Mhe. Raisi Magufuli anajenga nchi akimaliza kila kitu kitakuwa sawa tuwe wavumilivu,”amesema Dakawa

Akiongea katika kongamano hilo Mkuu wa Shule ya Wasichana Kondoa Mwalimu Frola Nussu amesema shule imemuenzi Mwalimu Nyerere katika falsafa yake ya Elimu ya kujitegemea ambapo wanalima mbaazi ambazo wakiuza wanapata fedha za kutimiza mahitaji yao madogo madogo shuleni.

Hata hivyo mmoja wa watoa mada mzee maarufu Mzee Kova amesema kuwa kuelekea katika uchaguzi mkuu watanzania wanapaswa kumuenzi Baba wa Taifa kwa kuchagua viongozi bora wanaojua shida zao kwani kura zao ndio maisha yao.

Kongamano la kumuenzi Baba wa Taifa linafanyika kwa mara ya pili katika Shule ya Wasichana Kondoa ambapo mgeni rasmi alikuwa Mkurugenzi wa Halmashauri ya Mji Kondoa na kuhudhuriwa pia na viongozi wa dini, wazee maarufu, walimu wastaafu, bodi ya shule, walimu, Afisa Maendeleo ya Jamii na wanafunzi na mada mbalimbali zilijadiliwa ikiwa ni pamoja na kusikiliza hotuba mbalimbali za Baba wa Taifa.