"Tumieni kiingereza muwapo shuleni"- Afisa Elimu Sekondari

Tarehe iliyowekwa: January 20th, 2023

Wanafunzi wa kidato cha kwanza Halmashauri ya Mji Kondoa wametakiwa kutumia lugha ya kiingereza wawapo shuleni kwa kuwa ndio lugha ya mawasiliano katika shule za Sekondari.

Kauli hiyo imetolewa na Afisa Elimu Sekondari Mwalimu Annette Nara alipokuwa akiongea na wanafunzi wa kidato cha kwanza katika Shule ya Sekondari Gubali ikiwa ni ziara yake ya ufuatiliaji wanafunzi wa kidato cha kwanza.

"Hakuna atakayekucheka ukikosea sababu wote hapa tunajifunza na mmekuwa mkifundishwa kiingereza toka mlipokuwa darasa la tatu hivyo fanyeni mazoezi tu ya kuongea kiingereza mtaweza,"amesema Mwalimu Nara

Ameongeza kwa kusema kuwa lugha ya kiingereza inafanyiwa mazoezi hivyo kwa kukaa kimya haitawasaidia sababu watakuwa hawajifunzi na hiyo ndio lugha ya masomo yote isipokuwa somk la kiswahili.

"Rafiki zenu ambao wamefaulu na hajaripoti shuleni kawaambieni  waje shuleni kwani serikali itakuja kuwakamata pamoja na wazazi na walezi wao na kuwafunga gerezani mnataka kufungwa mpoteze ndogo zenu?"ameuliza Mwalimu Nara

Aidha amewapa moyo kwa kuwaambia wote wana akili na hakuna mjinga kati yao kwani kufaulu ni juhudi za mwanafunzi kwa kuzingatia nidhamu, kutii kanuni za shule na kuhudhuria vipindi vyote.

Hata hivyo Afisa Elimu alimpa motisha ya fedha Mwalimu Mzava wa somo la kiswahili kutoka a na wanafunzi kufaulu somo hilo katika mtihani wa taifa wa kidato cha pili na kuwasihi walimu wengine kuongeza bidii katika ufundishaji ikiwa ni pamoja na kuzingatia maagizo yote waliyopewa wakati wa kikao cha elimu ngazi ya mkoa.