"Tumshukuru Mhe. Rais kwa kuwapeleka watoto shule"- RC Senyamule

Tarehe iliyowekwa: September 15th, 2023

Mkuu wa Mkoa wa Dodoma Mhe. Rosemary Senyamule amewataka wakazi wa kata ya Bolisa na wanakondoa kwa ujumla kumshukuru Mhe. Rais kwa kuwajengea shule kwa kuhakikisha watoto wote wanaotakiwa kwenda shule wanakwenda shule.

Ameyasema hayo wakati wa ziara ya ukaguzi wa ujenzi katika Shule ya Sekonadri Bolisa inayojengwa katika kata hiyo Mtaa wa Poisi baada ya kupokea zaidi ya shilingi milioni 544 kwa ajili ya ujenzi wa Shule Mpya ya Sekondari ya kata ya Bolisa ambapo hadi sasa zaidi ya shilingi 200 zimetumika.

“Mmepata bahati ya kujengewa shule mpya yenye kila kitu na mwaka huu wilaya ya Kondoa mmebahatika sana kwasababu mnakumbka si muda mrefu mmetoka kuona madarasa ya awali yamejengwa ni mazuri yana michezo ya kuchezea watoto yaani utafikiri sijui mko ulaya bembea na kila kitu,”amesema Mhe. Senyamule

Ameongeza kuwa pia imejengwa shule mpya ya Msingi ya Miningani ambayo imekamilisha majengo yote, ambapo dhamira ya Mhe. Rais ni watoto wa kitanzania wote wapate elimu katika mazingira mazuri yanayofikika ili kusiwe na sababu ya kutoshindwa kwenda shule sababu madarasa yanayojengwa kwasasa ni sawa na ya mjini.

“Lakini nitoe shime kwa wanaBolisa kama Mhe. Rais anafanya hivyo wajibu wetu ni moja kuhakikisha watoto wanaenda shuleni, pili najua suala la utoro kwa mkoa wa Dodoma na wilaya ya Kondoa ni mojawapo wenye watoto watoro kwa wingi hivyo uzuri wa majengo uendane na idadi ya watoto wanaoenda shule,”amesisitiza Mhe. Senyamule

Aidha amesema ili thamani ya majengo iwepo watoto waende shule na kuwataka watendaji wa kata na mitaa kuwachukulia hatua wazazi wa watoto wasioenda shule kwa kuwa sheria ipo wazi kwa mazazi ambaye mtoto wake haendi shuleni na hatua zimeanza kuchukuliwa kwa baadhi ya wazazi ikiwemo kuwatoza faini.

Hata hivyo amewataka wananchi wa eneo hilo kuwa walinzi wa vifaa vya ujenzi ili vifanye kazi iliyokusudiwa  kwa kuwa kukamilika kwa miradi kunafanya nchi kuwa na mafanikio kwa muda mfupi ambapo inatoa fursa ya kufanya mambo mengine ya kimaendeleo kwa kuwa yanachukua muda mrefu.

Kwa upande wake Diwani wa kaya ya Bolisa Mhe. Hajati Ramla Abeid amesema kuwa sekondari ilikuwa kilio kikubwa cha wananchi wa kata yake hivyo wanaomba awafikishie shukrani kwa Mhe. Rais ikiwa ni pamoja na kumshukuru Mhe Mkuu wa Mkoa kwa kufika katika kata yao.

Mkuu wa Mkoa amefanya ziara katika kata ya Bolisa katika Halmashauri ya Mji Kondoa kwa kukagua mradi wa ujenzi wa Shule mpya ya Sekondari Bolisa ambapo aliambatana na wataalam mbalimbali kutoka ofisi yake, Mkuu wa Wilaya ya Kondoa Mhe. Khamis Mkanachi, viongozi wa chama, Kaimu Mkurugenzi na wakuu wa Idara.