Tungufu watakiwa kushikamana ujenzi wa madarasa

Tarehe iliyowekwa: October 14th, 2021

Kaimu Mkurugenzi Halmashauri ya Mji Kondoa Hassan Kiseto amewaasa wananchi wa Mtaa wa Tungufu kushikamana katika ujenzi wa maboma ya madarasa Shule ya Msingi Tungufu.

Ushauri huo ameutoa wakati wa kikao cha pamoja na Wananchi hao kilichofanyika katika Ofisi za Mtaa wa Tungufu hivi karibuni.

"Kwa hiyo  mradi ambao mnaendelea nao hapa wa ujenzi wa madarasa mawili  wananchi mnapaswa kushikamana katika kujenga maboma alafu fedha ambazo zimetolewa na serikali zitatumika kwa ajili ya umaliziaji sababu zimeletwa kwa ajili ya umaliziaji",amesema Kiseto.

Ameendelea kwa kusema kuwa kwenye maendeleo hakuna neno kushindwa na kama kuna changamoto ni vyema waziseme ili kujua wanakwama wapi na ndio maana wapo kwa ajili ya  kuwasikiliza ili kero zao ziweze kupatiwa msaada.

"Wakuu wa Idara wamepewa watu wawili kila Kata kama Walezi hivyo basi mimi na Sekela ni walezi wa Kata ya Suruke  pamoja na mitaa yake kupitia kikao hiki tumekuja kujitambulisha hivyo kama kuna jambo ambalo lilikuwa linakwama kufika haraka Halmashauri au kwa Mkuu wa Wilaya basi tupo pamoja na ninyi kuona tunaongeza nguvu ya Mawasiliano baina yenu na Halmashauri", amesisitiza Kiseto.

Halikadhalika ameongeza kuwa kama walezi na wao ni sehemu ya jamii ya Tungufu hivyo kama kutatokea kazi inayohitaji nguvu kazi au michango pamoja na mikutano ya hadhara na wao waitwe ili kuendelea kushikamana vizuri kuliko ilivyo kuwa huko nyuma.

Naye Mwenyekiti wa Halmashauri ya Mji Kondoa Mhe. Mohamed Kiberenge amesema kuwa bado anaimani na wananchi wa Tungufu kuwa wanataka maendeleo na ndiyo maana wanataka marekebisho yafanyike hivyo amewataka kuendelea kuchangia nguvu kazi huku akiwataka viongozi wanaosimamia ukusanyaji wa fedha hizo kufanya kazi yao kwa uaminifu bila kuacha kuwasomea taarifa za mapato na matumizi na endapo watafanya kinyume na hapo hatua kali za kisheria zitachukuliwa dhidi yao.

"Unapoacha kuchangia sio kuwa unajiona mjanja hapana ila unaua maendeleo ya kwenu wenyewe na watoto wenu ndio wanaenda kukaa sehemu mbaya na ukiangalia mvua zinakuja na  majengo hayana uhakika wakiangukiwa itakuwaje na sisi tunashindwa kuishawishi Serikali kuleta fedha nyingine kwa sababu hamjamaliza madarasa ya awali,"amesisitiza Mhe. Kiberenge

Hata hivyo Mhe. Kiberenge amewaambia wananchi wa Tungufu kuwa wasiposimama vizuri kwenye miradi inayojitokeza mendeleo yanayoenda kulala ni yaTungufu na aibu itatokea kwao maana Serikali inaendelea kumwaga fedha nyingi na bado kuna miradi mingi ya kutekeleza lakini wao  bado wameshindwa kukamilisha  mradi  mmoja walionao wakati wenzao wote wamekwisha kamilisha hivyo basi katika jitihada za  kuhakikisha anahamasisha wananchi wanakamilisha mradi huo ametoa kiasi cha shilingi elfu hamsini na kuwaomba wengine kufanya hivyo.

Kwa upande wake Diwani wa Kata ya Suruke Mhe. Japhari Ganga amewashukuru walezi wa Kata ya Suruke waliofika kusaidia kuhamasisha wananchi katika shughuli mbalimbali za kimaendeleo na kuahidi kuwapa ushirikiano.

Akiongea kwa niaba ya wananchi wa Mtaa wa Tungufu mmoja wa wananchi waliojitokeza kwenye kikao hicho ametoa changamoto zinazowakabili wakazi hao ikiwemo kutokuwepo na mikutano ya wananchi ambayo inatoa nafasi kwa wananchi kutoa maoni juu  ya shughuli za maendeleo zinazoendelea katika Mtaa wao pamoja na kutokuwepo kwa ushirikiano baina ya wananchi na baadhi ya viongozi.

Kikao cha pamoja baina ya viongozi na Wananchi wa Mtaa wa Tungufu kimefanyika huku kikiwa na lengo la kujadili na kutatua changamoto zinazowakabili katika kukamilisha mradi wa ujenzi wa vyumba viwili vya madarasa na kuhudhuriwa na Mwenyekiti Halmashauri ya Mji Mhe. Mohamed Kiberenge, Kaimu Mkurugenzi Hassan Kiseto, ,walezi wa Kata ya Suruke, Mtendaji Kata na Mtaa pamoja na Wananchi.