"Tusimamie miradi kwa kesho inayong'ara" - Dkt. Mkanachi

Tarehe iliyowekwa: February 24th, 2022

Mkuu wa Wilaya ya Kondoa Mhe.Dkt Khamis Mkanachi  amewaasa wananchi na viongozi wa Halmashauri ya Mji Kondoa kusimamia vizuri fedha zinazotolewa na Serikali kwa ajili ya utekelezaji wa miradi mbalimbali.

Kauli hiyo ameitoa wakati wa mkutano wa hadhara pamoja na wananchi na viongozi wa Kondoa Mji uliofanyika katika viwanja vya stendi ya zamani hivi karibuni.

"Wajibu wetu sisi ni kusimamia vizuri fedha hizi ambazo Serikali inaleta kwa ajili ya kutekeleza miradi mbalimbali kwenye maeneo yetu lakini pia nimshukuru Rais wetu Mhe.Samia Suluhu Hassan kwa kuniamini na kuniteua kuwa muwakilishi wake katika Wilaya ya Kondoa ninamuahidi kuisimamia vizuri miradi yote ili  miradi inayojengwa  basi iendane na thamani ya fedha inayotolewa", amesema Dkt. Mkanachi.

Dkt. Mkanachi ameendelea kusema kuwa anajivunia kuwa na timu nzuri ya viongozi na wataalam ambao wote wanazungumza lugha moja na wanapopata changamoto wanazigeuza kuwa fursa na kwa sababu hiyo ndio maana hawakwami.

" Tunapozungumzia maendeleo tunazungumzia watu na sio vitu hivyo ni wajibu wetu sisi kama viongozi ni kutengeneza mazingira mazuri kwa kila mtu bila kujali imani au kazi yake na tunafanya hivyo kwa kuimarisha ulinzi na usalama ili kila mtu afanye shughuli zake kwa amani bila kubugudhiwa na chochote"amesisitiza Dkt. Mkanachi.

Vilevile amewaambia wananchi pamoja na viongozi kuwa mnamo tarehe 8/2/2022 Rais Samia Suluhu Hassan aliongea na wakuu wa Mikoa kuhusiana na anuani za makazi pia anataka mrejesho kila mwisho wa mwezi ili kuona zoezi limefikia wapi lakini pia kutambua changamoto mapema na kuzitafutia ufumbuzi na jana Mhe.Mkuu wa Mkoa alikuwa hapa kwetu kwa ajili ya jambo hilohilo na sisi tunalileta kwenu ili tushirikiane kuona linakamilika kwa wakati.

"Nina imani kubwa kwamba kwamba hatutashindwa na jambo hili na tutakuwa wa kwanza kumaliza zoezi hili na leo tumetangaza nafasi 130  za ajira za muda kwa siku saba haya yote tunafanya ili kuhakikisha kuwa zoezi hili linakwenda kukamilika haraka sana ili tuendelee kunga'ra",amesisitiza DC Mkanachi.

Kwa upande wake Mwenyekiti wa Halmashauri ya Mji Kondoa Mhe.Mohamed Kiberenge amemshukuru Mkuu wa Wilaya pamoja na Mkurugenzi kwa usimamizi mzuri wa ukusanyaji wa mapato ambapo mpaka sasa Kondoa Mji inatekeleza miradi mbalimbali kwa kutumia mapato yake ya ndani na kwamba hii haijawahi kutokea toka kuanzishwa kwake.

" Mbali na miradi ambayo Halmashauri inaitekeleza lakini pia Serikali bado inaendelea kutoa fedha nyingi kwa ajili ya miradi mingine mingi ikiwemo ujenzi wa vyumba vya madarasa,jengo la dharura la hospitali pamoja na vituo vya afya kwa hili naipongeza sana serikali yangu",amesema Mhe.Kiberenge.

Halikadhalika mmoja wa wananchi walioshiriki mkutano huo Mzee Hamidu Hamis Mkoti almaarufu Kadogoo amemuomba Mkuu wa Wilaya kuwasaidia wazee ambao hawana uwezo wa kugharamia matibabu ambapo Dkt. Mkanachi amejibu kwa kuwaambia wazee wote kujitokeza na kukata bima ya CHF iliyoboreshwa kwa gharama ya shilingi 30,000 kwa watu sita kwa mwaka sawa na shilingi 500 kwa mtu mmoja kwa mwaka.

Mkutano wa hadhara kati ya Mkuu wa Wilaya,Viongozi pamoja na Wananchi umefanyika ambapo wananchi walipata nafasi ya kutoa maoni,kero na kuuliza maswali ambayo yalijibiwa na Mkuu wa Wilaya,Mkurugenzi pamoja na wataalamu wa Idara mbalimbali na kuhudhuriwa na Mkuu wa Wilaya, Kamati ya Ulinzi na Usalama,Wakuu wa Idara na Vitengo,Watendaji wa Kata na Mitaa na Wananchi.