"Tutumie stendi rasmi kuongeza uchumi wa Wanakondoa Mji"- Mkurugenzi Majaliwa

Tarehe iliyowekwa: September 5th, 2024

Mkurugenzi wa Halmashauri ya Mji Kondoa Ndg. Said Majaliwa amewakumbusha wamiliki wa magari ya kusafirisha abiria ndani na nje ya Halmashauri ya Mji Kondoa kutumia stendi rasmi zilizotengwa ili kukuza uchumi wa wananchi wote.

Ameyasema hayo ofisini kwake wakati wa mahojiano maalum na vyombo vya habari kuhusu masuala mbalimbali ikiwemo matumizi ya stendi rasmi ndani ya Halmashauri.

“Mfano basi linalotoka Kingale ukiliruhusu lishushe abiria kila eneo linapotaka maana yake umebana fursa za bodaboda waliopo kwenye vituo vyao zaidi ya 50 ambapo abiria angeshushwa stendi hata bajaji angepata riziki”amesema Mkurugenzi Majaliwa

Aidha amesema anawashauri abiria na wamiliki wa mabasi ya kusafirisha abiria kutumia Stendi ya Bicha kwa kuwa Halmashauri imewekeza fedha zaidi ya shilingi milionikwa kujenga miundombinu rafiki kwa abiria na magari ikiwemo eneo la kupaki magari, choo na kibanda cha abiria kupumzika.

Aidha ameendelea kuwakumbusha wamiliki wa magari yaendayo barabara kuu ya Arusha-Dodoma kuhakikisha wanaingia katika stendi ya mabasi Bicha na kuacha tabia kupakia na kushusha abiria sehemu yoyote au katika stendi zisizo rasmi.

“Hapa mjini stendi rasmi ni tatu tu ambazo ni Stendi ya Mjini au Ubembeni, Srendi ya Bicha na Stendi ya Magereza ambayo imewekwa kwa ajili ya kuwasaidia wananchi wanaokwenda au kutoka Hospitali yetu ya Mji kupata matibabu kinyume na stendi hizo ni kuvunja utaratibu uliopo kisheria na wamiliki wanajua”amesisitiza Mkurugenzi Majaliwa.

Ameendelea kuongeza kuwa stendi ya Ubembeni haijafungwa na amemshukuru Rais Mhe. Dkt. Samia Suluhu Hassan kwa kuipatia Halmashauri ya Mji fedha kwa ajili ya ujenzi wa Stendi ya kisasa kupitia mradi wa TACTIC ambao unatarajia kuanza mapema mwaka 2025.