Uadilifu, uaminifu wasisitizwa kwa wasimamizi wasaidizi na waandikishaji wapigakura

Tarehe iliyowekwa: October 5th, 2019

Tukielekea katika zoezi la uandikishaji wapigakura wasimamizi wasaidizi ngazi ya kata, mitaa na waandikishaji wameshauriwa kuwa waadilifu na waaminifu ili kukamilisha zoezi la uandikishaji wapigakura kwa uaminifu.

Hayo yamesemwa na Mkurugenzi wa halmashauri ya Mji Kondoa Msoleni Dakawa alipokuwa akifungua mafunzo kwa wasimamizi wasaidizi na waandikishaji wapigakura yaliyofanyika katika ukumbi wa Mcha Kondoa Mjini.

"Zoezi mbele yetu ni gumu na ndio maana halifanyiki mara kwa mara hivyo mkalifanye kwa kufuata Sheria, Kanuni na Taratibu na naamini mtaweza,"alisema Mkurugenzi Dakawa.

Aliongeza kueleza kuwa serikali imewekeza fedha nyingi katika uchaguzi huu na kuleta fedha za uchaguzi mapema ili kuhakikisha hakuna mkwamo wowote hivyo waitendee haki serikali kwa kulifanikisha kwa umakini zoezi hilo.

Aliendelea kusisitiza kuwa washiriki wote waliochaguliwa kuzingatia watakayoelekezwa na wakufunzi na kuacha kufanya kazi hiyo kwa mazoea kwani uchaguzi wa sasa ni tofauti na wa awali hivyo wazingatie zaidi kanuni zilizopo katika uchaguzi wa mwaka huu.

"Usipoelewa uliza usifanye jambo lolote kwa uelewa wako tu mkafanye kazi kwa kushirikiana ukipata mkwamo uliza kwanza na mwisho wa mafunzo mtapewa namba za wakufunzi wasilianeni nao,"alisisitiza Mkurugenzi Dakawa.

Awali akiongea msimamizi wa uchaguzi Kondoa Mji Mwalimu Hassan Mtamba alisema kuwa wasimamizi wote na waandikishaji waliochaguliwa anaamini watafanyakazi vizuri kwa kuwa ni watumishi wa umma kwa mujibu wa kanuni na wamepitia mchakato mrefu hadi kupatikana kwao.

Zoezi la uandikishaji wapigakura litaanza Oktoba 8 hadi 14, 2019 na jumla ya waandikishaji 62, wasimamizi wasaidizi wilaya 3, kata 8 na mitaa 36 waliapishwa na Hakimu Mkazi Davis Jackson Maimu katika mafunzo hayo.