Upendo Na Mshikamano Kuimarisha Utendaji Kazi

Tarehe iliyowekwa: March 13th, 2019

“Tufanye kazi kwa upendo, mshikamano na kwa kufuata sheria na taratibu za kiutumishi ili tusijekuachana njiani kwani lengo letu ni moja kuipandisha hadhi Halmashauri yetu ili siku moja iwe Manispaa”

Maneno hayo yamesemwa na Mkurugenzi wa Mji Kondoa Msoleni Dakawa alipokuwa akiongea na watumishi wasaidizi wa Wakuu wa Idara katika ukumbi wa Biashara Kondoa mapema leo.

Alisema  kuwa ni wajibu wa kila mtumishi atimize majukumu yake kwani kila mtumishi ana nafasi yake na umuhimu katika taasis na kila moja ana haki yake katika utumishi hivyo ili kufikia malengo yake na hayo yanawezekana endapo wote wataepuka maneno na majungu kazini.

Aidha katika kikao hicho Mkurugenzi alielezea mafanikiao ya Halmashauri kwa kipindi cha miezi sita ikiwemo kutatua kero nyingi za wananchi na Watumishi.

“Kwa kipindi cha miezi sita tumefanikiwa katika maeneo mbalimbali ikiwemo kuongeza demokrasia kazini, kuongeza kasi ya ukusanyaji wa mapato, kufanya vikao vya kisheria, kupata sheria zetu ndogo, kupata watumishi wapya, kutatua changamoto za maji kwa baadhi ya maeneo yaliyokuwa na changamoto.”Alisema Dakawa

Aliendelea kueleza kuwa kutokana na kuongezeka kwa mapato Halmashauri imeendelea kulipa madeni mbalimbali na ili kuendelea kujiimarisha zaidi wamebuni vyanzo vipya vya mapato na kuongeza njia za udhibiti wa vyanzo vya awali kwa kuweka mageti stendi na kuhakikisha kila mfanyabiashara analipa kodi anayostahili bila kujali cheo chake.

Aliendelea kusisitiza kutunza siri za ofisi na serikali na kuacha tabia ya kuzungumza mambo ya ofisini vijiweni kwani kuna wasemaji wa ili kulinda heshima ya taasisi na kuwashukuru wakuu wa Idara kwa kuonyesha ushirikiano katika utendaji kazi kila siku.

Wakiongea watumishi katika kikao hicho walipongeza mwenendo wa Halmashauri kwa kipindi hicho na kuelezea changamoto wanazokabiliana nazo katika utendaji wao wa kazi za  kila siku ikiwemo upungufu wa vitendea kazi, kukosa ushirikiano kutoka idara nyingine na kutopanda madaraja kwa baadhi ya watumishi.

Hata hivyo Mkurugenzi alihitimisha kwa kujibu changamoto za watumishi kwa kusema kuwa halmashauri itaendelea kununua vitendea kazi ili kuhakikisha kazi hazisimami na kuongeza kuwa suala la upandaji wa madaraja unafanyika kwa kulingana na bajeti ambapo kwa kipindi cha miezi sita zaidi ya watumishi 300 wamepandishwa na zoezi ni endelevu na kuwahakikishia kuwa kila  mtumishi anayestahili kupanda daraja atapanda.