“Upitishaji wa taarifa ya ufungaji wa hesabu za mwisho uwe endelevu”- Mhe Hamza Mafita

Tarehe iliyowekwa: September 24th, 2019

Wataalam wa Halmashauri ya Mji Kondoa wameshauriwa kuendeleza utaratibu wa kupitisha taarifa ya Ufungaji wa Hesabu za Halmashauri katika vikao vya baraza ili kuondokana na hoja za Mdhibiti na Mkaguzi Mkuu wa fedha za serikali.

Ushauri huo ulitolewa na Mwenyekiti wa Halmashauri ya Mji Kondoa Mhe. Hamza Mafita wakati wa kikao cha baraza maalum la kupitia na kupitisha taarifa ya Ufungaji wa Hesabu za Halmashauri kwa mwaka wa fedha 2018/2019 kilichofanyika katika ukumbi wa Chuo cha Uuguzi Kondoa.

“Toka kuanzishwa kwa halmashauri hii mwaka 2016 hakijawahi kufanyika kikao cha baraza la kupitisha taarifa kama hii na hii ni historia kwa mara ya kwanza natoa pongezi za dhati kwa Mkurugenzi na timu ya Menejimenti kwa kulifanikisha hili ndani ya muda uliopangwa na serikali,”alisema Mhe. Hamza

Akisoma taarifa hiyo kwa niaba ya Mkurugenzi wa Mji, Mweka Hazina wa Halmashauri Ndugu Onesmo Mwonga alisema kuwa taarifa ya ufungaji wa hesabu za mwisho za mwaka wa fedha 2018/2019 ulikamilika kwa taarifa zote ambazo ni kitabu Kikuu, kitabu cha sekta ya Maji na kitabu cha sekta ya Afya.

Aliongeza kwa kusoma muhtasari wa ufungaji wa Hesabu za Mwisho ambazo zilionyesha vipengere vya mizania ya hesabu za mwaka 2018/2019, Hesabu za Mapato na Matumizi kwa mwaka wa fedha 2018/2019, hesabu za mtiririko wa fedha kwa kipindi cha mwaka 2018/2019 ikiwa na bakaa, mali za halmashauri na uchakavu zilizoingia kwa kipindi hicho na mali za kudumu zilizoongezeka kwa mwaka wa fedha 2018/2019 na hesabu za usuluhisho wa taarifa ya fedha benki.

“Wakati wa kufunga Hesabu za mwisho za mwaka wa fedha 2018/2019 tarehe 30/06/2019, Halmashauri ya Mji Kondoa ilikuwa na fedha taslimu katika akaunti mbalimbali za halmashauri ambazo zilikuwa kiasi cha Tshs. 2,031,655,024.00,”alifafanua Mweka Hazina Mwonga.

Hata hivyo aliendelea kueleza kuwa katika kipindi cha mwaka 2018/2019 halmashauri inadai jumla ya Tshs. 183,066.421.00 kutoka kwa watu mbalimbali ikiwemo wakusanya ushuru na taasis mbalimbali na inadaiwa jumla ya Tshs. 1,604,626,114.96 ikiwa ni madeni ya wazabuni, watumishi na malipo ya viwanja.

Baraza maalum la uwasilishaji wa taarifa za Hesabu za Mwisho umefanyika katika Halmashauri ya Mji Kondoa ikiwa ni utekelezaji wa agizo namba 31(1) na 31(7) la Memoranda ya fedha za mwaka 2009 na limehudhuriwa pia na viongozi wa Chama Cha Mapinduzi na wajumbe wa kamati ya Ulinzi na Usalama wilaya ya Kondoa.